Imvula ayiphazamisanga ukubhalwa kweSingisi ku-matric KwaZulu-Natal
IMVULA ebihambisana nombani nomoya ehlasele ezinye izifunda ngoMsombuluko ntambama KwaZuluNatal ayizange iphazamise ukubhalwa kwephepha lokuqala leSingisi, izolo.
UMnyango wezeMfundo esifundazweni uthi le mvula ehlasele izifunda uMzinyathi neZululand ayizange iphazamise ukubhala.
Okhulumela lo mnyango, uMnuz Sihle Mlotshwa, uthe ngokwemibiko abayitholile akukho lapho kungabhalwanga khona ngenxa yokuthi kube nomonakalo.
“Siyajabula ukuthi yonke into ihambe kahle ezikoleni,” kusho uMlotshwa.
Uthe uNgqongqoshe walo mnyango, uMnuz Mthandeni Dlungwane uhambele izikole iMaritzburg College, Carter High neLaduma High KwaMpumuza, eMgungundlovu, eyohlola ukubhala kwabafundi.
ELaduma High kwadutshulwa uthishanhloko ekuqaleni konyaka efundisa abafundi bakwa-matric. EMaritzburg abafundi abathathu bangena enkingeni ngemuva kokushutha bephethe izikibha ze-EFF begqoke umfaniswano wesikole.
UMnuz Allen Thompson, iPhini likamengameli weNatu, uthe yonke into ihambe kahle njengoba bekuqala ukubhala.
“Sizoqhubeka siqaphe ukubhalwa kwalezi zivivinyo. Nemvula eihlasele kwezinye izifunda ayizange iwuphazamise u-matric,” kusho uThompson.
NoMnuz Bheki Shandu, iPhini likanobhala weSadtu, uthe bathole imibiko yokuthi yonke into ihambe kahle.
Isolezwe lihambele eMlazi Comtech izolo lapho kwaphephuka khona amanye amagumbi okufundela emasontweni ambalwa edlule lafica abafundi bebhala.
Uthishanhloko uMnuz Nathi Shandu, uthe abaphazamisekanga ngoba akuphephukanga amakilasi okubhalelwa kuwona.
“Bangu-304 abafundi ababhalile, babhalele ehholo nakwamanye amakilasi. Umonakalo owadaleka esikoleni ngenxa yezimvula ubalelwa ku-R2.5 million,” kusho uShandu.
UThozama Mrwebi, wasePort Shepstone, ohlala ngaphakathi kulesi sikole, uthe libhalekile iphepha lesiNgisi wathi kodwa kunemibuzo emithathu angazange ayiphendule.
“Ngishaywe yisikhathi ngangakwazi ukuphendula le mibuzo emithathu. Kodwa leli phepha libhalekile belingekho nzima.”
ULungelo Mkhize, uthe belidinga isikhathi iphepha ngoba umbuzo wokuqala bekumele uwufunde uwuqonde ngaphambi kokuwuphendula.
“Isikhathi besisincane kodwa lona belingenzima. Uma usuqalile ukubhala uvalo luyaphela nya.”
UFezeka Mbatha, ofunda eRidge Park College, uthe iphepha belibhaleka kodwa kukhona ezinye izinto ebeziyinkinga.
Namhlanje kubhalwa i-Accounting.