‘Bekungafanele zidedelwe izingane izulu lisaduma’
ILUNGU lomndeni womunye wabafundi ababili baseMsinga abashaywe wumphezulu bafa ngoMsombuluko uthi ukuba isikole asibakhiphanga izulu lisaduma ngabe basaphila.
UMnuz Kwenzakwakhe Shabalala waseMsinga, uyise omncane kaNomcebo (8), uthe beliduma ngokwedlulele ngesikhathi izingane ziphuma esikoleni.
UNomcebo, obefunda uGrade 3 eMandlethu Primary, ubehamba no-Amahle Sithole, obefunda uGrade 6, esikoleni esifanayo, abafe naye. Bangomakhelwane abahamba ndawonye uma kuphuma isikole.
UShabalala uthe izulu liqale ukuhloma ngezithuba zabo-1 emini izingane zisesikoleni.
“Ezinye izikole zamabanga aphezulu zidedeliwe ngoba kubonakala ukuthi izulu libi. Bekuyizithuba zabo 3 ngesikhathi kulimala izingane. Kuthiwa ezinye izingane abebehamba nazo zingene komunye umuzi, oNomcebo bagijima bejahe ukuthi bafike umfula ungakagcwali ngoba belina kakhulu,” kusho uShabalala. Uthe indlela ebeliduma ngayo akekho okwaze ukusiza izingane zisanda kushaywa izulu.
Uthe bonke abantu bebesezindlini, izingane zabonakala seliphenyile izulu.
“Kubizwe i-ambulensi kodwa yafika izingane sezivele zishonile. Siphatheke kabi njengomndeni, ikakhulukazi ngoba okwenzekile kwehlele omakhelwane. Ngicabanga ukuthi izingane bezizosinda ukube zisheshe zadedelwa noma zisale sezihlaliswa esikoleni kuze kudlule izulu,” kusho uShabalala.
Ngesikhathi kunenkonzo yokukhumbula abashone nezikhukhula eThekwini muva nje, uNqongqoshe obambile eMnyangweni wezokuBusa nokuBambisana noBuholi boMdabu, uNkk Weziwe Thusi, wayihlaba eyokudedelwa kwezingane izulu lina. Wanxusa othisha ukuthi bahlale nazo izingane kuze kudlule izulu ngoba ukuzidedela kuzibeka engcupheni.
Okhulumela umnyango, uMnuz Msawakhe Mayisela, uthe bebevele benezinhlelo nemikhankaso yokuqwashisa ngokuduma kwezulu okuba mandla esifundazweni uma kuyihlobo.
“Ungqongqoshe usekhiphe ithimba elizosiza imindeni eshonelwe. Umnyango uzohambela nezikole ukuqwashisa ngokuduma kwezulu. Amathimba ethu ami ngomumo ukulekelela uma kwenzeka kuvela inhlekelele. Sifuna kuchitshiyelwe imithetho komasipala ukuze kube wumthetho ukuthi zonke izakhiwo zikahulumeni zibe nezinduku ezivimbela umphezulu,” kusho uMayisela.
UNgqongqoshe wezeMfundo KwaZulu-Natal, uMnuz Mthandeni Dlungwane, uthe uyazwelana nemindeni yabafundi abafile.
Isifundazwe sisanda kuqokwa njengendawo yenhlekelele emuva kokushona kwabantu abawu-16 ngemuva kokuhlasela kwezikhukhula.