Bacikwa eyombiko ongadedelwa
IYAQONGA ingcindezi yokuthi uMengameli Jacob Zuma adedele umbiko wekhomishini ebiphenya ngemfundo yamahhala ezikhungweni zemfundo ephakeme.
UZuma uthole umbiko wekhomishini ebiholwa yijaji uJonathan Heher ngo-Agasti kanti ihhovisi likamengameli lathi uzowufunda bese ewunekela izwe.
INehawu, inyuvesi yaseKapa, Higher Education Transformation Network neSasco basezinhlakeni ezinxuse uZuma ukuthi adedele umbiko ukuze abafundi bazi ukuthi bami kuphi uma kuqala unyaka.
Enye yezinhlangano zabafundi, Pan Africanist Student Movement of Azania (PASMA), imashele ezindlini zoMbuso ngeledlule yanika uZuma amasonto amabili ukuthi adedele umbiko yathi izobhikisha ivale zonke izikhungo zemfundo ephakeme uma lokho kungenzeki.
Uphiko lwentsha lweANC nalo lwaphumela obala lwathi lufuna ngoJanuwari ngonyaka ozayo kuqale imfundo yamahhala emanyuvesi.
UNobhala jikelele weNehawu, uMnuz Zola Saphetha, uthe sekuphela izinyanga ezintathu uZuma athola umbiko kodwa namanje akawudedeli.
Uthe bafuna ukwazi ukuthi ngabe uhulumeni uzokwazi yini ukuhlinzeka ngemfundo yamahhala.
“Abafundi sebeyacasuka njengoba seyiqalile imibhikisho ezikhungweni ezifana neCape Peninsula University of Technology neNyuvesi yaseFree State. Siyazi ukuthi amanyuvesi aseziqalile izingxoxo ngokunyuswa kwemali yokufunda ngonyaka ozayo yingakho umengameli kumele awudedele umbiko,” kusho uSaphetha.
Umphathi wenyuvesi yaseKapa, uDkt Max Price, uzwakalise ukukhathazeka ngokuthi namanje awukadedelwa.
Uthe kudingeka bahlele isabelo mali sangonyaka ozayo ngakho kumele bazi ukuthi imali bazoyinyusa ngamalini.
“Noma ngingazi ukuthi umbiko uzothini kodwa sisayimisile indaba ethinta ukunyuswa kwemali kuze kudedelwe umbiko. Ukungakhishwa kwawo kwenza singakwazi ukuhlela kahle izinto, ubambezela zonke izinhlaka ezikhungweni zemfundo,” kusho uPrice. Uthe abakwazi ukuyishiya ilenga kanjalo indaba yokunyuswa kwemali ngoba isikhathi siyahamba.
Inyuvesi yaseKapa ibalwa kwashayeka kakhulu ngemibhikisho yokunyuswa kwemali yokufunda.
UDkt Bongani Ngqulunga, okhulumela uZuma akayiphendulanga imibuzo athunyelwe yona.
Esitatimendeni asikhipha wathi uZuma uwutholile umbiko, uzowufunda bese izwe.
I-SACP ithe ngisho obenguNgqongqoshe weMfundo ePhakeme, uDkt Blade Nzimande oxoshwe nguZuma ngeledlule, ubengakaze awuthole umbiko wekhomishini, akazi nokuthi zithini izincomo zawo. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. azisa