‘UKhuzani samthandela ingoma qha’
KULEZI zinsuku uma kukhulunywa ngomaskandi oyisilomo, umculi ongakufikela emqondweni, uKhuzani ‘Indlamlenze’ Mpungose. URank Manager Zwane ngomunye wezinduna eziwumgogodla wempumelelo yalesi sihlabani esingapheli emicimbini. UCHARLES KHUZWAYO ukhulume nenduna yeZindlamlenze neZindlamlenzekazi zodumo lweStatimende, uRank Manager.
CHARLES (CK): Ngubani ngempela lo Rank Manager ohola lezi zinkumbi zabalandeli abaziwa ngeBlue Nation?
RANK MANAGER (RM): Amagama ami angempela uMvumeleni Advocate Zwane oyinkosana ezinganeni ezinhlanu zikaMnuz Jetros Zwane noNkk Ntombi uMaButhelezi. Ngidabuka Osuthu, KwaNongoma, kodwa ngisebenza njenge-Electrician eWitbank, eMpumalanga. Yize ngingakashadelwa kodwa ukhona usisi omuhle engithandana naye. Ngafunda oPhaphasi Primary eMtubatuba naseKwandeni Combined, okuyilapho ngaphothula khona u-matric ngaphambi kokufundela iDiesel Mechanic nezifundo zikagesi.
CK: Uqale nini ukulandela umculo kamaskandi?
RM: Ngiqale ngo-2004, ngithanda kakhulu iBhova likaDikadika lisanda kukhipha iCD eyayithi Tomorrow Morning kodwa lathi uma lishona ngo-2009 ngangabe ngisazi ukuthi ngilandele muphi umculi. Ngize ngalandela uKhuzani ngemuva kokuzwa iCD yakhe eyayithi Bahluleke Bonke ngo-2011 ngoba ehamba ezinyathelweni zeBhova.
CK: Yiziphi izinguquko ezenzeke ngaphansi kobuholi bakho?
RM: Ngokubambisana nabanye ozakwethu, sifike sahlanganisa abalandeli beqhawe ezindaweni ezihlukahlukene abakuzo, savula amagatsha amaningi ezindaweni zasemakhaya, savula nama-sub branch amaningi emanyuvesi, sabeka izinduna ezizowaqapha ukuze izinto zihambe ngendlela, sase sithula ngokusemthethweni umbala weqembu oluhlaza okwesibhakabhaka ongagayelwa mphako kulezi zinsuku. Ngaphansi kwalobu buholi obukhona iqhawe selizuze izinto eziningi.
CK: Ninamagatsha amangaki?
RM: Amagatsha esinawo maningi kakhulu adlulile ku-50 eKZN, eGauteng naseMpumalanga.
CK: Njengoba senaziwa ngeBlue Nation, yini eyenza nakhetha umbala oluhlaza njengesibhakabhaka?
CK: Sawukhetha ngoba kungumbala omuhle, ogqamile nokungumbala okhombisa impumelelo kukho konke esasesikwenzile, sihlanganisa iqembu.
CK: Njengabalandeli, niteketiswa ngaliphi igama?
RM: Amagama okuteketiswa ngawo iqembu asethanda ukuba maningi kakhulu njengoba kuthiwa Izikhokho zikaBlue, Blue Nation, EzakwaGuqa, muva nje sekuthiwa eZeStatimende.
CK: Yini nina naphuma iqhubu noKhuzani?
RM: UKhuzani asimdabukelanga, samthandela ingoma nje esezingeni eliphezulu okuyiyonanto esiyidingayo emculweni nokuzithoba-ke phambi kwabantu.
CK: Yikuphi ukudla okukhonzile?
RM: Inyama yenkomo eyosiwe nojeqe.
CK: Ngaphandle komculo kamaskandi, ukhonze muphi omunye? RM: Umculo weZayoni. CK: Yibaphi abanye abaculi obakhonzile?
RM: Yilaba abashaya ushuni weBhova okungoMdumazi, Dumakahle, Njoko noCevuzile.
CK: Yiziphi izindawo okhonze ukuzikhiphela kuzo?
RM: Ngikhonze ukuzikhiphela eThekwini nabangani bami, ngiyozibukela ulwandle kodwa hhayi ukuthi ngingene kulo, ngilusaba kabi.
CK: Ebholeni ukhonze liphi iqembu?
RM: Ngithanda kakhulu i-Orlando Pirates neChelsea eNgilandi bese eSpain kuba iBarcelona.
CK: Yiziphi izinhlelo zethelevishini okhonze ukuzibuka?
RM: Ithelevishini ngiyibuka uma kudlala ibhola kuphela.
CK: Uma kungathiwa qoka induna engaba yinkosi yazo zonke kumaskandi, iyiphi ongayikhetha?
RM: UMvumeleni Zwane, ngenxa yokuthi uhola izinkumbi zabalandeli futhi iqhawe lakhe lisesematheni.
CK: Bumi kanjani ubuholi bakwaGuqa?
RM: KwaGuqa kunekhabhinethi lamadoda ayishumi, okuyilona esibambisene kakhulu nalo, okuyilona eligila zonke lezi zimanga okungoPhiwayinkosi Khanyile, Sbekezelo Khanyile, Busobosaziwayo Dlamini, Sphamandla Mabaso, Msizi Ncube, Dear Msakazi Mpungose, Simphiwe Ntombela, Nsushe Nyembe noShewula Zulu bese kuba izinduna-ke zasemagatsheni amaningi ahlukahlukene.