UMchunu usemise umsebenzi kwakhe
I-DA KwaZulu-Natal inxusa uNdunankulu uMnuz Willies Mchunu ukuba awudayise umuzi wakhe wombuso oseParkside, eMgungundlovu, osususe umsindo ngenxa yezinsolo zokuthi ulungiswa ngoR32 million wabakhokhi bentela.
Umholi we-DA KwaZulu-Natal, uMnuz Zwakele Mncwango, uthe uMchunu kumele awufake endalini umuzi ukuze usetshenziswe abadinga indawo yokuhlala kakhulu.
I-DA eKZN izolo iye kulo muzi kaMchunu iyowuhlola ngemuva kwemibiko yabezindaba ethi kubekwe u-R32 million wabakhokhi bentela ukuze ulungiswe.
UMchunu useyalele ukuthi kumiswe ukulungiswa komuzi waphinde waphakamisa ukuthi kwenziwe uphenyo ngenhloso yokuthola ukuthi besikhona yini isidingo sokuthi ulungiswe nokuthi ilandelwe yonke yini imigudu yokukhipha ithenda yokwenza umsebenzi.
Ngokwemibiko yabezindaba ukulungiswa komuzi kuthiwa kuzodla u-R32 million kodwa uMnyango wezokuHlaliswa kwabantu esifundazweni, oholwa uMnuz Ravi Pillay, uyakuchitha lokho uthi okwamanje umsebenzi usadle u-R821 000.
“Lolu phenyo oluzokwenziwa luzophinde lusize ekutholeni ukuthi ngabe umsebenzi uyifanele yini imali obekelwe yona,” kusho uMchunu.
UMchunu uthe umphumela wophenyo uzonekelwa iKhabhinethi nomphakathi.“Okwamanje awukho umsebenzi ozoqhubeka njengoba sisafuna ukuphenya ngezikhalo zabathile mayelana nokulungiswa komuzi,” kusho uMchunu.
UPillay uthe u-R32 million okukhulunywa ngawo yisabelo-mali seminyaka eyisikhombisa sokulungisa umuzi.
“Isabelo-mali saqhamuka nethimba lochwepheshe abenza ucwaningo benza isilinganiso sokuthi umsebenzi ungabiza malini,” kusho uPillay.
Uthe ukulungiswa kwendlu kuhambisana nemigomo yoMkhandlu waMafa Heritage mayelana nezakhiwo ezineminyaka engaphezulu kwengu-60 wathi umuzi usuneminyaka engu-137.
Isakhiwo sinomuzi, izindawo ezimbili okungahlalwa kuzona uma kunemihlangano nehhovisi labasebenzi.