Ukhonjwa kweseMeya yeZululand uMncwango
SINGASE sivalwe yisekela likaSihlalo kazwelonke we-IFP uMnuz Mangaqa Mncwango isikhundla sobuMeya eMkhandlwini waseZululand esivuleke ngemuva kokukhishwa kweNkosi uMzamo Buthelezi.
UButhelezi (38) manje usezoba yilungu lekhokhasi ye-IFP ePhalamende likazwelonke.
UMengameli we-IFP Inkosi uMangosuthu Buthelezi ngoMsombuluko umemezele ukuthi uButhelezi uzoqala umsebenzi wakhe omusha ngoNovemba 1.
“Sithokozile ngobuholi obukhonjiswe uButhelezi ngesikhathi eyiMeya yaseZululand, ushiya umkhandlu waseZululand usesimeni esikahle,” kusho uMntwana waKwaPhindangene.
UMngcwango oyiMeya yaKwaNongoma manje kuthiwa uyena okubhekeke ukuthi angene endaweni kaButhelezi.
USihlalo we-IFP kuzwelonke uMnuz Blessed Gwala, uyichithile imibiko ethi iqembu lihlela ukufaka uMncwango endaweni kaButhelezi.
“Niyahlupha nina bezindaba ngoba niyathanda ukusiphawulisa ngezinto ezingekho, lolo daba alukaxoxwa futhi asikafiki kulona, abantu abalinde uMntwana waKwaPhindangene ukuthi enze isimemezelo bayeke ukulokhu beqagela izinto ezingekho,” kusho uGwala.
UMncwango kuthiwa ucatshangwa kulesi sikhundla ngenxa yokuthi nguyena mholi onamava futhi oyazi kahle iZululand.
Enza isimemezelo ngokukhishwa kukaButhelezi eZululand, uMntwana uthe manje yisikhathi esifanele ukuthi iPhini likaMengameli weqembu lijoyine ubuholi bukazwelonke ePhalamende.
“Njengoba amanye amaqembu enza, i-IFP nayo iyakuqonda ukubaluleka kokuba khona kukaMengameli nePhini likaMengameli ePhalamende, lokhu kuyasiza ekuqiniseni ubuholi kuzwelonke,” kusho uMntwana.
Uthe njengamanje iqembu limatasa nohlelo lokuqoka iMeya entsha yaseZululand.
Okwamanje isikhundla sobuMeya sibanjwe yiPhini leMeya, uNkk Mavis Kunene.