I-SABC mayingasifunzi ukudla esingakudli
MHLELI: Ngibhala le ncwadi ngenhloso yokuzwakalisa ukungeneliseki ngendlela inhlangano yezokusakaza, iSABC, esiphethe ngayo kanjalo nomsakazo Ukhozi neminye nje.
Kuke kwaba nomshado wasebukhosini bamaNgisi safunzwa wona sivezelwa kwithelevishini. Nalu nokhetho seluseduze uzobona isisigxisha ngemikhankaso yamaqembu ingenandaba nokuthi ngabe abantu ebasakazelayo bayayilandela yini kwapolitiki leyo.
Siyavuma yonke into isetshenzwa ngemali okungenzeka ukuthi engikhala ngabo basuke bekhokhile kodwa phela nathi siyawakhokhela amalayisensi. Yini uma kunemikhosi yesintu njengowoMhlanga, oweLembe, owokweShwama neminye ethinta thina maZulu nezinye izizwe singavezelwa yona iqala ize iyophela njengoba kwenziwa kwezombusazwe noma kunomgcagco wamaNgisi?
Yini edala ukuthi imikhosi yakomkhulu ingamakethwa ngendlela emisakazweni nakwithelevishini? Besingabalelwa ngani izinsuku ezisele ngaphambi kokufika kosuku lokukhumbula usuku lokukhothama kweSilo uShaka? Niyeka ukusifunza ngemikhosi ethinta amaqhawe akithi. Kubukeka sengathi sesifikile isikhathi sokulwela ukuba kugqanyiswe okwakithi hhayi ukufunzwa ngezombusazwe. Le nto esiyibona yenzeka yenza sizibuze ukuthi kuyoze kube nini iSABC iyizikhothangqoko zabasuke behola umbuso. Cha sikhathele ukufunzwa nesingakudli sifuna ezithinta thina nemizwa yethu, sifuna ezithinta ubuthina nobukhosi bethu.
Asisakazelwe imikhosi yethu. Ngabe angibenzi ubulungiswa uma ngingabongi uMnuz Edwin Mncwango noMnuz Themba Fakazi be-1 KZN TV. Lesi siteshi siqophe umlando senza okwehlule kokwenziwa ontabakayikhonjwa engibhale ngabo mhla besisakazela ukusuka nokuhlala ngoMkhosi woMhlanga. Benza lokho nje bananohlelo olubizwa ngezaseBukhosini olusibikela ngakho konke okuthinta imikhosi nemicimbi ethinta iSilo, indlunkulu nezindaba ezithinta umdabu. Ibambeni kanjalo 1 KZN. Wena SABC ake uyozinuka amakhwapha. Ngiyafisa nje nokwazi ukuthi nibakhetha kanjani abantu enibamemela ukuba bezokhuluma ngomlando nangamasiko ezinhlelweni zenu ikakhulu emsakazweni Ukhozi. Kuningi okusolisayo nalapho sengathi kubizwa abakhethiweyo.
Lokho kuyasilimaza ngoba kugcina kulandwe abantu abazolimaza into yethu enhle kube kushiywe abantu abanolwazi olunzulu. Namanje yingoba ningaboni ukuthi yini edala ukuthi lesi siteshi singawuhlanganisi lo 10 million wabalaleli esasithi sifuna ukufika kuwo kusekhona uBhodloza? Zinukeni amakhwapha SABC nabaphathi boKhozi.