I-BLSA ixoxisana nabakwa-Eskom
INHLANGANO yamabhizinisi kuleli, iBusiness Leadership South Africa (BLSA) isikuqinisekisile ukuthi inezingxoxo nabakwa-Eskom mayelana nokumataniswa nezinsolo zenkohlakalo nokuqhwagwa kombuso yidlanzana.
Le nhlangano ithe icelwe abakwa-Eskom ukuthi kuxoxwe emuva kokuba abakwa-Eskom bemisiwe ekubeni yingxenye yale nhlangano yamabhizinisi.
Ngokwesitatimende esithunyelelwe abezindaba, kuvela ukuthi izingxoxo ziqale ngoLwesihlanu phakathi kukaMnuz Bonang Mohale oyisikhulu seBLSA nesikhulu esibambile kwa-Eskom uMnuz Sean Maritz.
Kuthiwa lezi zingxoxo ziwubufakazi bokuthi iBLSA isavulelekile ekutheni isebenzisane nabakwa-Eskom futhi izimisele ukudingida okudale izinkinga nezinsolo zenkohlakalo.
“Okwamanje abakwa-Eskom basakhishiwe kwiBLSA futhi kusazoba kanjalo kuze kube siyaneliseka ngezingxoxo,” kusho uMohale.
Phakathi kokudingidwa ezingxoxweni kubalwa uphenyo olunzulu mayelana nezinsolo ezithinta inkohlakalo. I-BLSA inombono wokuthi kudingeka ushintsho olukhulu kwa-Eskom njengoba uneqhaza elikhulu ekufukuleni umnotho wakuleli. Iphakamisa nokuthi kukhethwe ibhodi nobuholi obusha kwaEskom obuzoba nesipiliyoni esinzulu kwezamabhizinisi.
UMohale uthe bacela uhulumeni ukuthi angenelele ekuqokweni kwebhodi elisha kwa-Eskom ukuze isimo sisheshe sibuyele kwesijwayelekile.
“Sizoqhubeka nezingxoxo nabakwa-Eskom nohulumeni namanye amalungu ethu esiwamisile kule nhlangano, ukuze silwe nenkohlakalo nokuqhwagwa kombuso yidlanzana,” kusho uMohale.