UBrockie akacabangi ukushiya iSuperSport
UMGADLI weSuperSport United, uJeremy Brockie, akayicabangi eyokushiya iqembu okwamanje ngoba isifiso sakhe wukuqhubeka nokulinqobela izicoco ezimqoka.
Isikhulu esiphezulu kwiSuperSport, uStanley Matthews, sisanda kuphumela obala ngokuthi uma uBrockie enganqobela iqembu isicoco seCAF Confederation Cup noma eseTelkom Knockout sizozamukela izicelo zamaqembu agaqele lesi sibabuli saseNew Zealand. NgoJuni besifunwa uthuli yiMamelodi Sundowns. Size safaka ngisho isicelo sokuthi sikhululwe kodwa iSuperSport yasichitha.
Ngempelasonto uBrockie ushaye igoli lakhe lika-10 ngesikhathi ezakhe ziqumba phansi iClub Africain yaseTunisia emdlalweni womlenze wesibili we-semi final yeCaf Confederation Cup.
Amatsatsantsa A Pitori anqobe ngo 3-1 emdlalweni womlenze wesibili. Umlenze wokuqala waphela ngo 1-1 kanti iSuperSport izodudulana neTP Mazembe kowamanqamu. Umlenze wokuqala useLubambashi, eDRC ngempelasonto kaNovemba 17 bese kuthi ngoNovemba 24 kudlalwe umlenze wesibili.
UBrockie uthe akukho emqondweni wakhe ukushiya iSuperSport okwamanje.
“Ngizwile isikhulu esiphezulu seqembu siveza ukuthi uma sinqoba esisodwa kulezi zicoco ezimbili esizozilwela ngaphambi kokuthi kuphele unyaka, sizozilalela izicelo zamaqembu angifunayo kodwa mina angigxilile lapho. Akukho emqondweni wami ukudlalela ukushiya iqembu. Mina ngidlalela ukuwinela iqembu izicoco. Amathuba afana nalawa awafiki njalo.
“Ukudlala umdlalo wamanqamu womqhudelwano wase-Afrika akuyona into eyenzeka njalo. Lapha asimele iSuperSport kuphela kodwa simele iNingizimu Afrika yonke. Lesi sicoco iqembu alikaze lisiwine. Siqophe umlando ngalokhu, manje sesifuna ukuzibhalela omunye ngokuba ngompetha,” kusho uBrockie.
Njengoba esehlohle amagoli awu-10 kwiConfederation Cup umgadli omlandela eduze nguBen Malango ogijima kwiTP Mazembe.
“Kungangijabulisa ukuwina isicoco seConfederation Cup nomklomelo womdlali oshaye amagoli amaningi. Lokho kungasho lukhulu kimina. Ngizimisele ngokwengeza esibalweni sami samagoli kowamanqamu. Siyazi ukuthi ngeke kube lula kodwa sike sadlala neTP phambilini sathola amagoli amabili sidlala ngokulingana ngo 2-2. Nakulokhu sidinga ukuthola amagoli asekuhambeni bese siqedela umsebenzi ekhaya,” kusho uBrockie.