UBAXTER USHAYE NGESITHENDE URONALDO
UMQEQESHI weBafana Bafana, uStuart Baxter, akazange ayihhoye indaba yesilomo sasePortugal, uCristiano “CR7” Ronaldo, ngesikhathi kuvotelwa abablali abashaye into ecokeme emhlabeni kunobhutshuzwayo.
Umcimbi wokuklomelisa abadlali iBest Fifa Football Awards ubuseLondon ngoMsombuluko ebusuku. URonaldo onqobe isicoco seligi nese-Uefa Champions League neqembu lakhe iReal Madrid yaseSpain, waphinde wasiza iPortugal ingena kwiNdebe yoMhlaba ka-2018.
Udle umhlanganiso emunxeni we-Best Fifa Men’s Player. Lona bese kuwunyaka wesibili lo mgadli edlisela ogageni uLionel Messi waseArgentina noNeymar waseBrazil. Usethathe isicoco sakhe sesihlanu kule miklomelo okuyisibalo esilinganayo nesikaMessi.
Kulo mkhakha kuvota abaqeqeshi bamaqembu esizwe nokaputeni bakhona.
UBaxter kwawakhe amavoti ubeke uMessi endaweni yokuqala, walandelisa ngomdlali weChelsea, u-Eden Hazard no-Andries Iniesta weFC Barcelona.
Ivoti lakhe liphikisane no-43% wamavoti atholwe u-CR7 njengoba uMessi elale endaweni yesibili ngo19%.
Ukaputeni weBafana, uThulani Hlatshwayo, yena uvotele u-CR7, walandelisa ngoSergio Ramos odlalela iMadrid wase ebeka uHazard endaweni yesithathu.
Unozinti weBaroka FC u-Oscarine Masuluke obeqokelwe emunxeni wegoli elivelele ukhale ngaphansi kunqoba umgadli we-Arsenal u-Olivier Giroud. Bahlukaniswe amavoti angaphezulu kuka-70 000. UGiroud uthole angu-290 765, uMasuluke uthole angu-217 658.
UBaxter uzomemezela isikwati kusasa nokulindeleke ukuthi singashintshi kulesi esibukise ngeBurkina Faso emasontweni adlule, siyixebula ngo 3-1. Kulesi sikwati kade kugiya abadlali abasebancane nabangajwayele ukudlala kwiBafana okukhona kubona uPercy Tau weMamelodi Sundowns noThamsanqa Mkhize weCape Town City. Kubhekwe nokuthi angasali uThulani Serero obuyelwe yifomu phesheya kwezilwandle.
Amaqembu angu-16 ayibamba kwi-Absa Premiership azogadulisana ezinkundleni ezahlukene ukukhipha ayisishiyagalolunye azodlulela kumaquartefinal.
Noma ngabe ulandela liphi iqembu nokuthi umphumela womdlalo uzoma kanjani kodwa kungenzeka izihlathi zivakashele izindlebe.
AbakwaTelkom banikeza abalandeli ithuba lokuwina u-R100 000, ama-data nomklomelo wezinto zokudlala zesikole umlandeli azosiqoka yena.
Ukuze uzibeke ethubeni kufanele uchofe *123# usebenzisa i-sim card yakwaTelkom, uthenge ama-data.
Ama-data athengiwe azophindaphindwa ngesibalalo samagoli amaningi ashaywe emdlalweni okushaywe inethi kakhulu kuwona.
Ngaphezu kwalokho, ngokungenela umncintswano, umlandeli uzozibeka ethubeni lokuwina u-R100 000.
AbakwaTelkom bazophinde banikeze abalandeli ithuba lokuqoka isikole ababona sifanele ukuthola izinto zokudlala zenani lika-R50 000. Isikole esiwinile sizothola ukuqeqeshwa ukuze kuzothu -thuka abadlali bangomuso. Ukuqoka isikole abalandeli kudingeka bathumele igama lesikole ngomqhafazo ku-33927. Amathikithi emidlalo yeTelkom atholakala eTicketPro, Edgars, CNA, Postnet, nasezitolo zaKwaJet. Abiza u-R40 awabadala. Awezingane ezingaphansi kweminyaka engu-12 abiza u-R15.