Uzoguqula inhlanhla ye-Arrows uChideu
UMGADLI omusha weLamontville Golden Arrows, uThomas “Zaza” Chideu unecebo elingasiza umqeqeshi wakhe uClinton Larsen, aqede ukuba yithofi kwaBafana Be’sthende kwi-Orlando Pirates.
La maqembu azodudulana kwiLast 16 yeTelkom Knockout ngoMgqibelo ngo-3.30 ntambama, ePrincess Magogo Stadium, KwaMashu.
UChideu (21) usanda kusayina kwi-Arrows esuka kwi-Ajax Cape Town yize engazange abe nesikhathi esimnandi eKapa. Lo mgadli waseZimbabwe ubingelele abalandeli be-Arrows ngegoli lokulinganisa sekuvalwe amehlo bebhekene nePolokwane City ngempelasonto.
Leli goli uChidue ulishaya nje ulakhelwe uKnox Mutizwa ongomunye wabagadli abenza kahle kwi-Arrows kusukela efikile ngesizini edlule. UChideu uthe ukudlaliswa noMutizwa ngesikhathi esisodwa yikhona okungaba ukhiye wokugqobhoza iPirates.
“Ngikhule naye uKnox futhi uyangazi engikufunayo enkundleni nami ngokunjalo yinto efanayo. Ngeke ngimshayele umthetho umqeqeshi ngokuthi akadlalise bani ngoba uyena owazi kangcono kodwa ukudlala kwami noMutizwa kungaba nezithelo eqenjini njengoba besenza eminyakeni edlule sidlala ndawonye kwiHighlanders ngasekhaya,” kusho uChideu.
Ukuba khona kukaMutizwa, Kudakwashe Mahachi noDanny Phiri kwi-Arrows kumenzele yonke into yaba lula uChideu ngoba uyabazi nasemaqenjini esizwe.
“Ngamukelwe ngenkulu imfudumalo. Lokhu kungenze ngabona ukuthi isinqumo engisithathile siphusile. Ukuba khona kwabakhaya kungenza ngijwayele ngokushesha. Akukho engingakuthembisa abalandeli ngaphandle kokuthi ngizobasebenzela ngakho konke enginakho,” kusho lo mgadli othe akayibambele gqubu i-Ajax.
“Konke lapho ngihamba khona abantu bangibuza nge-Ajax. Angisekho lapho mina. Kufana nekhasi eselivaliwe kodwa ngeke ngiliyeke ithuba lokubonga i-Ajax ngokungenza indoda kumbe umdlali ongcono.”
Mayelana nomlando ongemuhle we-Arrows uma ibhekene nePirates uChideu uthe kuzoba nzima.
“Sibhekene neqembu elikhulu futhi elidlala kahle kulezi zinsuku. Kuhle lokhu ngoba nabo babhekene nathi kwazise sibaphethe baningi abadlali abangaba yinkinga kubona. Umlando awumuhle kodwa iqiniso limile ekutheni inhloso yomlando ukuthi kuqoshwe omusha. Yilokho kanye esikucabangayo ngaphambi kwalo mdlalo,” kusonga uChideu.