Uzohlonishwa esaphila uThwalofu
KUZOHLONISHWA inkakha kamaskandi esimnkantshubomvu ngedili lomculo, uThwalofu “Nkunziyembongolo” Khoza ngoMhlathuze Maskandi Festival ozoba seMhlathuze Sports Complex ngoMgqibelo.
Isikhulu esiphezulu kwezokuxhumana kuMasipala waseMhlathuze, uMdu Ncalane, sithe bakwenza lokhu ngenxa yamagalelo alo mculi emculweni, babone kungcono bamhloniphe esaphila.
“UThwalofu waba negalelo kakhulu ekugqamiseni umculo kamaskandi. Ungomunye wabaculi abadala futhi asebevundulule ikhono kubaculi abaningi. Yize esemdala kodwa usaqhubeka nokuvundulula amakhono amasha emculweni kamaskandi. Sibone kuyinto enhle ukuthi simhloniphe esaphila ngoba kuke kungabukeki kahle uma sekugqanyiswa imisebenzi yomuntu engasekho emhlabeni, ekubeni belikhona ithuba lokuthi ahlonishwe esaphila. Njengoba sizoqala ukuhlonipha iNkunziyembongolo ayibekwa kubo kwaKhoza, asizogcina ngaye kodwa namanye amaqhawe angasekho emhlabeni sizowakhumbula.
“Sinqume ukuqala ngaye ngoba kunguyena osaphila oqhamuka esifundeni iKing Cetshwayo,” kusho uMdu.
Uthe okuphinde kwenza bagxila emculweni kamaskandi, kungenxa yegalelo labo njengoba izindawo eziningi zasemakhaya zidume ngenxa yemisebenzi yabo.
Kubaculi abazoshiyelana inkundla kulo mcimbi kukhona, uKhangelani “DSD” Mhlongo, Khuzani “Indlamlenze”Mpungose, Mthandeni “Igcokama Elisha” Manqele, Mjikijelwa “Ichalaha” Ngubane, Qhoshangokwenzakwakhe, Sgwebosentambo nabanye abaculi bendawo.
Lo mcimbi uthe bawenze ngokubambisana noMnyango wezokuThutha KwaZulu-Natal njengoba u-Okthoba kuyinyanga yezokuthutha.
Abazohambela umcimbi uthe bazongena mahhala kodwa banxuswa ukuthi baphathe umnikelo wezicathulo zesikole nemisubela ukulekelela abafundi besifazane njengoba kukhona abangenayo imali yokuyithenga.
Umcimbi uzoqala ngo-9 ekuseni uze uphele ngo-5 ntambama.