Bakhishwe ngonogada abebekhalaza ngogesi
KUBIZWE onogada abakhiphele ngaphandle abahlali basemijondolo yaseBottlebrush, eChatsworth abaphazamise umhlangano woMkhandlu weTheku izolo bekhala ngogesi.
Laba bahlali bafuna uMasipala ubafakele ugesi abathi sekuphele iminyaka behlala kule ndawo bengafakelwa.
Kulo mhlangano kuphinde kwakhishwa elinye lamakhansela abephazamisa umhlangano.
UNksz Noloyiso Godongwana, uthe sebehlale kule ndawo iminyaka engu-20 kodwa dololo ugesi.
“Yingakho sinqume ukuthi size kulo mhlangano ukuze sizozizwela ukuthi siwuthola nini ngoba sihlale sithenjiswa. Asinawo ugesi kule ndawo,” kusho uNksz Godongwana.
UNksz Fatima Ismail, ohlala emizini eyakhele le mijondolo uthe banqume ukuphelezela abahlali ngoba befuna umasipala ubafakele ugesi.
“Sifuna bayeke ukuntshontsha ugesi wethu ngaleyo ndlela wonke umuntu uzojabula. Okwamanje sithwele kanzima ugesi uyasicishela nsuku zonke, okuthatha ngisho izinsuku ezine ukuthi uphinde ulungiswe,” kusho uNksz Ismail ohlala emgwaqweni uRaffia.
Okhulumela umasipala, uNksz Tozi Mthethwa, uthe nakuba bekugqugquzela ukuthi umphakathi uthamele imihlangano yomkhandlu kodwa kumele ulandele imigomo yomkhandlu.
Uthe uSomlomo womkhandlu, uMnuz William Mapena, uqale wanxusa amalungu aseBottlebrush ukuthi ehlise umsindo ngoba abephazamisa umhlangano.
“Ube esewanxusa ukuthi alandele imigomo yomhlangano kodwa kwanhlanga zimuka nomoya. Bebephazamisa ngesikhathi kuqhubeka ingxoxo mayelana nokufakwa kukagesi emijondolo.
“Sigcine sibize onogada ukuthi basize bakhiphe amalungu abephazamisa,” kusho uNksz Mthethwa.
Uthe kuthe kusaqhubeka umhlangano uSomlomo wanxusa elinye lamakhansela ukuthi liwushiye umhlangano ngoba nalo beliphazamisa.
“Ngemuva kokuba leli khansela linqabile ukwenza lokhu, uSomlomo ube esenxusa onogada ukuthi balisize. Umhlangano uqhubeke ngaphandle kokuphazamiseka.”
Uthe uma kunemihlangano kunemigomo elandelwayo.
“Uma umenyiwe ulandela imigomo yalowo osuke ekumemile. Awukwazi ukuphazamisa, uma ufuna ukubhikisha uyavunyelwa kodwa uma uzolandela imigomo ebekiwe yomthetho,” kusho uNksz Mthethwa.