Usephenduke intandokazi uMabuza
SEKUQUBUKE umbango ngoSihlalo we-ANC eMpumalanga uMnuz David Mabuza phakathi kwabaholi benhlangano abagaqele isikhundla sikamengameli njengoba kubhekwe engqungqutheleni kaDisemba.
UMabuza ophinde abe nguNdunankulu eMpumangala usephenduke isilomo njengoba kuyiwa engqungqutheleni njengoba kunenkolelo yokuthi ulawula wonke amagatsha ombutho esifundazweni sakhe.
Igama likaMabuza liyavela ezinhlangothini zezimbangi ezinkulu, uDkt Nkosazana Dlamini Zuma nePhini likaMengameli uMnuz Cyril Ramaphosa.
Kunemibiko futhi ethi lo mholi waseMpumalanga usebenzisana umshoshaphansi noMgcinimafa-jikelele we-ANC uDkt Zweli Mkhize emkhankasweni wakhe njengoba naye esibheke ngabomvu esobumengameli.
Yize uMabuza amemezela ukuthi uyaphuma kuhlangothi lukaDkt Dlamini Zuma ngaphambi kwengqungquthela yemigomo ebiseNasrec eGoli ngoJuni kodwa abalandeli bakaDkt Dlamini Zuma bayaqhubeka nokulifaka igama lakhe njengePhini likaMengameli.
Muva nje uRamaphosa naye uveze amagama abaholi afisa babe isigungu esiphezulu sakhe, akazange alishiye ngaphandle igama likaMabuza njengoba emfake esikhundleni sikaMgcinimafa-jikelele.
Umhlaziyi wezepolitiki ozimele uSolwazi Bheki Mngomezulu uthe ukungaconsi phansi kukaMabuza kuhlobene nezibalo zakamuva ezikhombisa ukuthi zimi kanjani izibalo zezithunywa ezizoya engqungqutheleni.
“IMpumalanga isiphenduke isifundazwe sesibili ngobukhulu kwi-ANC ngemuva kweKZN njengoba phambilini isifundazwe ebesilandela iKwaZulu-Natal bekuyi-Eastern Cape,” kusho uMngomezulu. IMpumalanga inezithunywa ezingu-736, ngemuva kwezingu-870 zaseKZN, sezizonke izithunywa ezizoya engqungqutheleni kaDisemba zingu-4723.
UMngomezulu uthe yize zehlile izibalo zezithunywa zaseKZN kodwa isahamba phambili.
“Uma usembangweni wesikhundla sikaMengameli usekwa amagatsha amaningi aseKZN nawaseMpumalanga usuke ususemathubeni okuthi uyingqobe ingqungquthela,” kusho uMngomezulu.
Uthe ngenxa yobudlelwano phakathi kukaMengameli Jacob Zuma noMabuza, ubona lo mholi waseMpumalanga ezogcina engena kuhlangothi lukaDkt Dlamini Zuma.
Omunye umhlaziyi wezepolitii ozimele, uMnuz Xolani Dube onguMcwaningi kwisikhungo iXubera Institute uthe amavoti kuphela into eyenza uMabuza abangwe.
Uthe umbuzo okhona manje othi kwi-ANC ngabe sekubhekwa ukuthi uza nezibalo ezingakanani noma uzoyenzelani inhlangano?