Uchitha ekaZuma nekhomishini
UNGOTI ezindabeni zoMthethosisekelo, uSolwazi Pierre de Vos uthi uMengameli Jacob Zuma akufanele kube nguyena osungula iKhomishini ezophenya ngezinsolo zokulawulwa kombuso yidlanzana ngoba kwayena ziyamthinta.
Engxoxweni neSolezwe izolo, uDe Vos uthe yinkantolo okumele inqume ukuthi ngubani ozosungula le khomishini njengoba noZuma ethinteka.
“NgokoMthethosisekelo uZuma nguyena kuphela onelungelo lokusungula iKhomishini kodwa uma engekho engaphandle kwezwe iphini lakhe yilona elinamandla,” kusho uDe Vos.
Uthe akekho umuntu onamandla okumyalela uZuma ukuthi kumele enzeni.
“UMvikeli woMphakathi akanalo ilungelo lokuyalela uMengameli ukuthi kumele enzeni ngodaba lokulawulwa kombuso yidlanzana,” kusho uDe Vos.
Uthe akayiboni leyo khomishini izosungulwa maduze.
UZuma ulaxaze ngomzuzu wokugcina isiphakamiso enkantolo sakhe sokuthi uchithwe umbiko oqukethe izinsolo ngokulawulwa kombuso yidlanzana.
Kodwa uZuma usamile ekutheni izincomo zika-Adv Madonsela kumele zibuyekezwe. Inkantolo izwe ibufakazi obuthi uMvikeli woMphakathi akanawo amandla okuyalela uZuma ukuthi kumele enzeni. Ummeli we-EFF u-Adv Tembeka Ngcukaitobi utshele inkantolo ukuthi iyamkhathaza indaba yokuthi kube nguZuma okuthiwa akasungule ikhomishini ezophenya ngokulawulwa kombuso yidlanzana . Uphenyo luka-Adv Madonsela ngokulawulwa kombuso yidlanzana luveza ukuthi umndeni wakwaGupta unesandla ekulawulweni kwezwe njengoba kuvela ukuthi uba nezwi ekuqokweni kongqongqoshe bekhabhinethi kaMengameli Zuma.