Bahlekise ngoSisulu ngolukaKhwezi
UPHENDUKE ihlaya ezinkundleni zokuxhumana uNgqongqoshe wezokuHlaliswa kwaBantu uNksz Lindiwe Sisulu ngezinkulumo zakhe ngowayesola uMengameli Jacob Zuma ngokumdlwengula.
UNksz Sisulu ubekhuluma kwi-702 nomsakazi u-Eusebius McKaiser ekuseni izolo, ebuzwa ngezinto eziningi obekubalwa kuzona icala elalibhekene nomengameli.
UZuma watholakala engenacala ngezinsolo zokudlwengula owesifazane owayaziwa ngoKhwezi.
UMcKaiser umcele ukuthi aphawule ngokuthi wayekukholwa yini okwakushiwo ngowesifazane owayaziwa ngoKhwezi owayesola uZuma ngokumdlwengula.
“Ngiyakholwa ukuthi wayekholwa ukuthi wadlwengulwa,” kusho uSisulu.
Embuza ukuthi ukholwa yini yena, uSisulu uthe ukholwa okwakushiwo nguKhwezi. Uthe kodwa akanabo ubufakazi obenele bokuthatha isinqumo ngalolu daba.
UNksz Sisulu uphinde wabuzwa ngezinsolo ezibekwe isikhulu sebhola esaziwayo ngumculi uJennifer Ferguson, kodwa ukubalekelile ukuphendula lo mbuzo. Uthe ukholwa wukuthi kufanele kungagxilwa ekutheni abantu bacabangani ngokushiwo wumgilwa kodwa kugxilwe ekushintshweni komcabango wabantu ngokuhlukunyezwa kwabesifazane.
UKhwezi ushone ngo-Okthoba nyakenye emuva kokuphila isikhathi eside ehaqwe yigciwane lengculazi. Umsakazi nombhali wezincwadi uRedi Tlhabi usanda kwethula incwadi ekhuluma ngempilo yakhe osihloko sithi Khwezi: The Remarkable Story Of Fezekile Ntsukela Kuzwayo.
UNksz Sisulu uphinde waphawula ngobuholi bukaZuma nesimo se-ANC samanje.
Inkulumo yakhe ishiye abantu beshaqekile ezinkundleni zokuxhumana.
The trillest King @ tumeditreezy: Ngisashaqekile ngokushiwo ngoKhwezi. Lapho sengizitshela ukuthi uLindiwe Sisulu nguyena muntu ongaba ngumengameli.
OB@BlvckAsh: Ngiyamthanda uLindiwe kodwa naye uyazi ukuthi ngeke futhi akufanele abe ngumengameli.