Izojezisa abangcolise igama layo iSAP
INKAMPANI yobuchwepheshe iSAP ithi izivezele yona imininingwane ngezinsolo ezibekwe le nkampani eNingizimu Afrika esolwa ngokugwaza enkampanini exhumene nabakwaGupta.
Bathe bakudalule lokhu kwiziphathimandla zase-USA mayelana nezinsolo zokuphulwa komthetho olwa nenkohlakalo, i-US Foreign Corrupt Practices Act.
Isitatimende esikhishwe yiSAP sithe basezinhlelweni zokujezisa abasebenzi bayo abathathu.
Inkampani yaphenya emuva kokuthi kuphume imibiko yabezindaba eyayiveza ukuthi yakhokha imali elinganiselwa ku-R100 million yokuthola amathenda akwaTransnet.
Emuva kophenyo lwayo seyiveze ukuthi yathola ukuthi kube nokungahambisi kahle kanti futhi isiqalile ngezinhlelo zokujezisa abasebenzi bayo abathathu abathintekayo nokushintsha izinhlelo ezithile zokusebenza ezinkampanini zayo.
UNkk Adaire Fox-Martin oyisikhulu seSAP uthe njengenkampani esebenza emazweni omhlaba bazimisele ngokusebenza ngokwethembeka futhi balandele umthetho. Uthe lezi zinyanga ezintathu ezedlule bekungezizothisayo kubona.
“Izinsolo zokungahambisi ngendlela kwenkampani yethu eseNingizimu Afrika zibe nomthelela omkhulu kubasebenzi bethu, emakhasimendeni, kwesisebenzisana nabo nomphakathi wonkana waseNingizimu Afrika. Siyaxolisa kakhulu ngalokhu,” kusho uNkk Fox-Martin.
Lokhu kulandela ukuphothulwa kophenyo lwangaphakathi lakwaSAP ngezinsolo ezithinta ukukhokhwa kwemali okuthiwa kwakugwazelwa ngayo inkampani exhumene nabakwaGupta ukuze bathole amathenda ezinkampanini zikahulumeni okubalwa kuzo uTransnet no-Eskom.