Sizoya ezingxoxweni nomqondo ovulekile: Gigaba
UNGQONGQOSHE wezeziMali kuzwelonke, uMnuz Malusi Gigaba, uthe bazoya ezingxoxweni zamaholo abasebenzi benomqondo ovulekile kodwa wangasho ukuthi bazimisele ngokuvumelana ngento engakanani nabasebenzi uma kuxoxwa.
Ekhuluma nezintatheli ngaphambi kokwethula isabelo mali saphakathi nonyaka ngoLwesithathu, uGigaba ukuvumile ukuthi ukukhokhelwa kwabasebenzi kuyamcindeza uhulumeni.
“Sizoya ezingxoxweni zamaholo. Wonke umuntu uyakwazi lokho,” kusho uGigaba.
Uthe kuzodingeka ubuchule nokuthi kuxoxwe kahle ukuze amaholo anyuswe ngendlela engeke ize ibe yingozi emnothweni wezwe. Uthe uhulumeni uzoletha ithimba eliqinile.
UGigaba uthe indlela abazimisele ukungena ngayo ezingxoxweni izogxila kakhulu ekuchazeni ngezingqinamba uhulumeni abhekene nazo ngethemba lokuthi izinyunyana zizosebenzisana nabo.
Ecacisa ngokuthi kungani engeke asho ukuthi bazimisele ngokubekani etafuleni, uthe bayazi ukuthi akufanele basheshe bakusho lokhu singakafiki isikhathi sezingxoxo.
“Sizoya lapha ngomcabango wokuthi kufanele sifinyelele esivumelwaneni esizoqinisekisa ukuthi siyakwazi ukubakhokhela abasebenzi,” kusho uGigaba.
Akazange afune ukucacisa ukuthi kukhona yini intela entsha ezofakwa ngonyaka ozayo.
Uthe enye yezinto abangazenza wukuthi kufakwe enye intela kodwa wathi izoqhamukaphi leyo ntela nokuthi izoqoqwa kanjani. Ngokusho kwakhe akulula ukusheshe akhulume ngayo.
Uthe iKhabhinethi seyikuphasisile ukudedelwa komthetho ongamele intela i-carbon tax okufanele ifakwe.