Umfundi waseKZN kowomhlaba wezeScience
UZOQHAKAMBISA igama lezwe lakhe nelaKwaZulu-Natal umfundi oneminyaka engu-15 ozobamba iqhaza kuma-International Junior Science Olympiad, eNetherlands ngoDisemba nonyaka.
U-Owami Mhlongo waseMobeni Heights ofunda uGrade 10 eSouthlands Secondary uzobe eqala ukuphuma kuleli evakashela kwelinye izwe.
Umqhudelwano ohlanganisa abafundi abavela emazweni ahlukene kulindeleke ukuba ube phakathi kukaDisemba3 noDisemba 12 nonyaka.
Ngokusho kukayise uMnuz Patric Hlongwane indodakazi yakhe iqale ezigabeni eziphansi zomqhudelwano nabanye abafundi kwiScience njengoba isizoya komela leli phesheya.
“Siyaziqhenya kakhulu ngendodakazi yethu. Ithanda kakhulu izifundo zeScience njengoba izohlala amasonto amabili phesheya ikulo mqhudelwano.
Siyajabula kakhulu ukuthi izokwazi ukuphuma kuleli okokuqala empilweni yayo iyosimela kumaOlympiad. Ukhombisa ubuhlakani ezifundweni zakhe esikoleni, ikakhulukazi yona iScience,” kusho uHlongwane.
Lo mqhudelwano wabantu abaneminyaka engaphansi kuka-16 ubheka kakhulu ukuthuthukisa izifundo zeScience, ukuchushisa abafundi ngeScience nokwandisa ulwazi lwabo kuyona.
Umndeni kaMhlongo bekumele uqoqe imali eningi ukuze uqinisekise ukuthi indodakazi yawo iyakwazi ukuthola ithuba eliyingqayizivela lokumela leli eNetherlands .
Uyise walo mfundi uthe kusekhona izinto okumele bazilungiselele indodakazi yakhe njengoba inalolu hambo.
“Singajabula uma singathola uxhaso ngoba konke kuphuma ephaketheni lethu. Sifisa indodakazi yethu ingaphazamiseki, ikwazi ukuhamba kahle,” kusho uHlongwane.
Lo mfundi kade esesikoleni ngesikhathi Isolezwe linengxoxo nomzali wakhe kodwa kuvele ukuthi usejahe kakhulu ukuba agibele ibhanoyi. Unina wakhe uNksz Nozipho Mhlongo, onguthisha kuvele ukuthi usebenze kanzima ukuze indodakazi yakhe ithole leli thuba.