Umnyango sewenze lukhulu ngezitifiketi
UMNYANGO weMfundo ephakeme uthi likhulu ibanga osulihambile ukuxazulula inkinga yokungazitholi izitifiketi kwabafundi abenza iNational Certificate Vocational (NCV) emakolishi amakhono, kusuka ngo-2007.
Umnyango uthi cishe bonke abafundi abebenenkinga yokungazitholi lezi zitifiketi sebezitholile.
Lokhu kulandela ukuhamba kancane kohlelo lokukhishwa kwezitifiketi emnyangweni.
Okhulumela umnyango, uMnuz Madikwe Mabotha uthe izitifiketi zeNational Diploma neNational Certificate (Vocational) [NC(V) sezifikile kubanikazi bazo.
Uthe ngoMashi 31 nonyaka zingu-20 475 izicelo abebezilungisa zalezi zitifiketi.
“Zibalelwa ku-2 000 izicelo esizichithile ngoba zingahambisani nemibandela ebekiwe. Kodwa sikwazile ukukhipha ezingaphezulu kuka-18 456 kulabo abebezilindile. Abafundi sebengazilanda ezikhungweni abebefunda kuzo,” kusho uMabotha.
Uthe zingaphezulu kuka-7 000 izitifiketi abazikhiphile ezicelweni abazithole ngoSepthemba nonyaka eziqwini iNational N Diploma.
“Lokhu kusho ukuthi sikwazile ukumelana nomnqamulajuqu wezinyanga ezintathu wokuthi sikhiphe izitifiketi zeNational N Diploma. Sisebenzisana neState Information Technology Agency (SITA) noMalusi (umkhandlu oqinisekisa izingabunjalo lemiphumela) ukuze sikwazi ukusabalalisa izitifiketi kusuka ngo-2007 emakolishi,” kusho uMabotha.
Uthe ukubambezeleka kwezitifiketi zeNCV bekusuka kuNovemba 2007 kuze kube uNovemba 2016.
Abafundi basemakolishi amakhono bebehlale bekhala ngokuthi minyaka yonke izitifiketi zabo aziphumi futhi abazi ukuthi kusuke kubambephi eMnyangweni weMfundo ephakeme.
UMabotha uthe enye yezinkinga ebiyenza kubambezeleke ukukhishwa kwezitifiketi wukungabi khona kolwazi olwanele oluthunyelwa amakolishi emnyangweni. “Sithole ukuthi kusamele sicubungule ubufakazi bezitifiketi ezingu-1 944 sisebenzisana neSITA. Siqhamuka nezinhlelo zokuthi sikwazi ukusheshisa indaba yokukhishwa kwezitifiketi.”
Lokhu kufaka ukusebenzisana noMnyango wezaseKhaya ukuze kuqhathaniswe izinombolo zomazisi.
UMabotha uthe sebenohlelo abafundi abangalusebenzisa ukubuza ngezinto ezithinta ukubambezeleka kwemiphumela emakolishi nezinto ezithinta ukungaphumi kwezitifiketi.
“Ngalolu hlelo abafundi bazokwazi ukungena kwi-internet babuze ukuthi kubambephi ngezinto zabo.
Bazokwazi ukubuza ngqo emnyangweni ukuze bazi ukuthi yiziphi izinto ezisuke zilungiswa. Bangasebenzisa nomaselula ukubheka ukuthi kwenzakani ngezitifiketi zabo.”
Abafundi bangaya ku:www. eservices.gov.za kuze babhalisele lolu hlelo.