Ziqale ukubhala ngaphandle kwezihibe izikole zasemajele
IZIKOLE ezintathu ezisemajele aKwaZulu-Natal zibhale izivivinyo zikamatric ezifundweni iMaths neMaths Miteracy ngaphandle kwezihibe.
Bangu-62 abafundi ababhala u-matric kulo nyaka kanti lesi sibalo sinyukile njengoba nyakenye bebengu-34.
Isikole i-Usethubeni Youth esejele iWestville, eminyakeni emihlanu edlule senza kahle kakhulu njengoba sithola u-100% kwa-matric.
Okhulumela umnyango wezokuhlunyeleliswa kwezimilo kulesi sifundazwe, uMnuz Thulani Mdluli uthe ukuthuthukiswa kwamakhono yinto esekhaleni lokuhlumelelisa abafundi abangu-2 577 ababhala izivivinyo kulo nyaka.
Uthe iziboshwa ezingenawo uGrade 9, kuphoqeke ukuthi zenze i-Adult Education and Training (AET) kusuka kuLevel 1 kuya ku-Level 4.
“Ngalokhu sifuna ukuqeda ukungafundi, ukungabi naziqu nokushoda kwamakhono abalulekile ukuze baqasheke.”
Uthe ukhomishana wezamajele esifundazweni uMnuz Mnikelwa Nxele, ufisele ababhalayo impumelelo.
Uncome umsebenzi omuhle owenziwa abafundisayo ogcine uholela ekutheni kuvulwe esinye isikole i-Ekuseni Secondary.
Unxuse abagada ukubhalwa kwezivivinyo abaqashwe wumnyango wemfundo eyisisekelo ukuthi besekwe ngalesi sikhathi ezikhungweni ezintathu okubhalelwa kuzo.
Esinye sezikole okubhalwa kuso u-matric iQalakabusha Secondary.
Bangu-258 abenza uGrade 8 kuya kuGrade 11, kwiTVET bangu-426, Higher Education and Training bangu-55 kuthi i-AET Level 1 kuya ku-4 babe ngu-1838.