Useguge iphakethe elapha ubuntu bakhe
UTHWELE kanzima owesilisa (42) waKwaSwayimane othe usebikelwa ngisho ecabanga ukuya ocansini ngenxa yobuhlungu obungapheli ebuntwini bakhe.
Owesilisa ocele ukuthi igama lakhe ligodlwe uthe inkinga yakhe iqale ngo-2007 ngesikhathi eqalwa ubuhlungu obabungabekezeleleki ebuntwini bakhe.
“Kwakuvele kubabe kube sengathi ngifakwe upelepele. Ngazitshela ukuthi ngithole isifo socansi ngase ngiya emtholampilo. Bazama ukungelaphela izifo zocansi banginika ama-antibiotics. Ngawaphuza isikhathi engangibekelwe sona kodwa ubuhlungu bangaphela. Bese ngilokhu ngibuyela njalo emtholampilo baze bangidlulisela esibhedlela ngoba bethi sebehlulekile,” kusho owesilisa.
Uthe uqale ukugqigqa esibhedlela sase-Edendale ngoNovemba 2007.
Ngokusho kwakhe ngesikhathi efika kulesi sibhedlela bamtshela ukuthi kungenzeka ukuthi ungenwa wumdlavuza wendlala yabesilisa.
Uthe ulashwe esibhedlela kwaze kwaba wuMashi 2008 waze waqoka ukuyeka ngoba engaboni mehluko.
Ube esehamba abelaphi bendabuko ngoba esebona ukuthi kungenzeka ukuthi yinto edinga ukwelashwa ngamakhambi esintu.
Uthe akayekanga ngoba esola isibhedlela kodwa wabona ukuthi kusho ukuthi naso akusekho esingamsiza ngakho.
Uthe uphinde waya emtholampilo ngo-2015, bamdlulisela esibhedlela saseNorthdale okuyilapho bamhlola khona bathi ababoni lutho, bamdlulisela e-Edendale nakhona baphinde bamhlola, bathi ababoni nkinga esithweni sakhe sangasese. Uthe uphelelwa ngisho yimali ayihola emsebenzini lapho esebenza khona njengonogada ngoba ezama ukwelapha ubuhlungu. Uveze ukuthi kunokuthi ixazululeke inkinga yobuhlungu seyidlulele.
“Ubuhlungu sebungenele ngisho ezindlaleni ngoba sekubuhlungu sonke isitho sami sangasese. Okuxakayo wukuthi ayishintshile indlela esibukeka ngayo angivuvukali ndawo futhi akuphumi ketshezi. Engizwana naye akukho isifo socansi akhala ngokuthi usenaso nokwenza ngidideke kakhulu. Kunalokho kuba buhlungu nje. Kuba buhlungu kakhulu uma ngikade ngiye ocansini osekwenza ngingabe ngisalulangazelela. Kuthi noma ngifuna ukuya ocansini lowomuzwa uvele udungwe wumcabango wobuhlungu.
“Ngiyafisa ukuthola umuntu ongangisiza ngoba sengisebenzise imali eningi ngizama ukuthola usizo,” kusho owesilisa. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.