Izithelo ezikoleni ngokuqoqa udoti
ZIZOTHUTHUKISA ingqalasizinda yazo izikole ezimbili, esaKwaMashu nesaseNtuzuma, eziklonyeliswe yinkampani ekhiqiza iziphuzo, iCoca Cola Beverages South Africa (CCBSA), emcimbini obuse-ICC, eThekwini, ngoLwesibili.
Le nkampani ibiklomelisa izikole eziqoqe udoti omningi, okungamakani nocwazi okubuye kusetshenziswe ukukhiqiza ezinye izinto.
Umcimbi wokuklomelisa izikole owenziwa minyaka yonke usungulwe ngo-2011. Isikole saKwaMashu i-Ekuthuleni Primary yiso esemuke nomklomelo omkhulu kaR50 000.
Isikole saseNtuzuma, Isiphosethu sona siklomeliswe ngoR30 000.
UNksz Lindiwe Khumalo ofundisa Ekuthuleni uthe uqale ngo-2011 ukuqoqa udoti ukuze ubuye usetshenziswe.
“Sathintwa abantu bakwaCCBSA basichazela ngalo mkhankaso wabo wokubutha udoti. Ngangicabanga nale mali ukuthi singayisebenzisa kanjani esikoleni ngoba isikole sethu sidinga ukuthuthukiswa kakhulu nemali esiyithola kuhulumeni incane.”
Uqhube wathi akuzona zodwa izingane zesikole ezibutha udoti kodwa zilekelewa nangabazali.
“Abazali ngabacela ukuthi basilekelele ukuthi sibuthe udoti ngoba kuzosingenisela imali, isikole sikwazi ukuthuthuka sibe indawo engcono yokusebenzela nokufundela izingane zabo,” kuchaza uNkk Khumalo.
Lesi sikole asiqali ukuthola lo mklomelo njengoba nanyakenye sawuthola.
UMnuz Themba Sobahabise waseSiphosethu uthe ngale mali abayitholile bazokwazi ukuthenga ezinye izinsiza ngoba yize uhulumeni ebaxhasa kodwa kubuye kushode ngoba izingane ziningi.
“Namawindi afile e-staff room. Sizokwazi ukuthi siwalungise. Siyethemba ukuthi le mali izokwanela.”
Ubonge kakhulu abakwaCCBSA ngokubazisa ngokuqoqa udoti ukuze ubuye usetshenziswe ngoba ngisho emphakathini sekunenhlanzeko ngenxa yalolu hlelo. Okhulumela abakwaCCBSA, uMnuz Samkelo Nkosi uthe lolu hlelo baluqale ngo-2011. Sezingu-40 izikole eseziyingxenye yalo KwaZulu-Natal. Isibalo siyanyuka.
“Ngiyafisa ukuthi lo mkhankaso wethu wokuqoqa udoti ungagcini kuphela ezikoleni kodwa nomphakathi wonke ube yingxenye yawo ukuze siqede ukungcola ezindaweni esihlala kuzo nabantu abangasebenzi bakwazi ukuba nento abayenzayo ezobangenisela imali,” kusho uNkosi.
Uthe bayethemba ukuthi bazokwazi nokukhuluma nasebeyimilutha yewunga abahlala eThekwini ukuthi nabo babe yingxenye yomkhankaso ngoba kungenzeka basizakale kuhlanzeke neTheku.
Ezinye izikole ezithole amatablet iDuduzane, Zimisele, Philani, Daluxolo, Thandokuhle neMthethweni.