Besicabanga ukuthi uZuma usezomxolela uNzimande
SEKUCACILE manje ukuthi uma unguNgqongqoshe kuKhabinethi kaZuma akufanele wenze izinhlelo zesikhathi eside ngoba izembe lihlezi liloliwe. Uma kungathiwa akubalwe abagilwa boNgqongqoshe asebegencwe yizembe likaZuma kungabalwa kuze kushone ilanga ngoba uMsholozi akacucuzi uma esefuna ukushumpula ngezembe lakhe.
Bakwethu sonke besesicabanga ukuthi uZuma useyomthethelela uBlade Nzimande ngoba akamgencanga ngesikhathi ekhipha uPravin Ghordhan noMcebisi Jonas. Konke ukucabanga kwethu kuphelele ezeni uma sesizwa izindaba zokuthi uZuma usephinde wamgawula uBlade kungazelele muntu. MaSolezwe okaVolos ubone kufanele axoxe noBlade Nzimande ngokumehlele.
Volos: Comrade Blade ngizwa kuthi angikubingelele ngale ngoma ethi: “UZuma lona abamaziyo abazange bambona!”
Blade: Volos musani ukuganga nincome uZuma ebheda ebulala umfelandawonye ngoba niyokhala uma umbuso sewubuyele emabhunwini.
Volos: Nxese Comrade Blade sonke siphatheke kabuhlungu sibona uZuma ekugawula nibe niyizinsizwa zandawonye.
Blade: Akunankinga mina ngicela ningangidabukeli ngoba angikhuliswanga yiphalishi likaZuma. Lesi sikhundla sobuNgqongqoshana singifice ngivele ngiziphilela ngingaxakwe yilutho ngoba ngigogodile kwezemfundo.
Volos: Yini lena eniyibanga noZuma ngoba kuyabonakala ukuthi izinga lokuzondana kwenu liphezulu kakhulu.
Blade: Mina angibangi lutho nalo muntu waseNkandla kodwa mhlawumbe yena anganichazela ukuthi uBlade wamdlelani.
Volos: Kunamahebezi okuthi uZuma ukuxosha nje vele anisakhulumisani ngoba wena uthathwa njengegoso elihola ingoma yokuthi akakhishwe esikhundleni sobumengameli.
Blade: Mina akusikhona ukuthi uZuma angimkhulumisi kodwa wukuthi anginaso isizungu sokuxoxa naye ngoba ngiyazi ukuthi kade angizingela efuna ukungikhipha kuKhabhinethi lakhe.
Volos: UZwelinzima Vavi ukhombise ukungakudabukeli ngokuxoshwa kwakho ngokuthi athi wena ungumuntu olobizela izikhundla ngoba wake wazicelela ukuthi wenziwe iphini likamengameli wezwe.
Blade: Uma ungaphika nomuntu onjengoVavi ungaphithanelwa yikhanda ngoba ngokwazi kwami nguyena owayehubuluza ngesisu efuna ukunikwa isikhundla sokuba yiphini likamengameli.
Volos: Ngicela usazise ukuthi uZuma wathini kuwena ngesikhathi ekwazisa ukuthi akasakudingi kuKhabhinethi yakhe.
Blade: Ngathi ngivuka ekuseni ngavuswa wucingo lwakhe wathi: “Hhe! Hhe! Blade mfanakithi ngicabanga ukuguqula iKhabhinethi kodwa wena awukho ezinhlelweni zami. Ngicela ukukubonga ngakho konke okuhle okwenzele umphakathi waseNingizimu Afrika.”
Volos: Kanjalo nje akangabe esachaza lutho olunye olunjengokuthi usezinhlelweni zokuthi akwenze inxusa?
Blade: Wangichazela ngesinqumo sakhe kuphela kwasho ukuthi nami ngisazivukela ebuthongweni anginasikhathi sokumbuza izinto eziningi.
Volos: Uma sekukhulunywa iqiniso kodwa nani senimgcone kakhulu nimklolodela nithi akanganesabisi ngokuthi uzonephuca izikhundla.
Blade: Kufihlwa kufihlwani ngoba vele uZuma uyancikisela ngezikhudla.
Volos: Kunamahlebezi okuthi uZuma angase amkhombe indlela uRamaphosa, kungabe uyayikholwa le mibiko noma kufanele siyithathe njengengamampunge?
Blade: Lo sibindigidi onguZuma angakwenza lokho ngoba sekucacile ukuthi akakhuzeki uma esehlose ukwenza into.
Volos: Siyakhumbula ukuthi wabe uyishoshozela elikhulu lokuthi akuxoshwe uMbeki kungene uZuma, namanje nguwena futhi ozihola phambili uthi akuxoshwe uZuma kungene uRamaphosa. Awunalo yini uvalo lokuthi noRamaphosa uyophinde akujikele njengoZuma?
Blade: Hhawu kungabe yibhadi elalivele kuphi elingahlala lilandela mina lenze ngijikelwe abantu engibafake ezikhundleni. Nginethemba elikhulu lokuthi uRamaphosa uyongiphathisa okweqanda uma esengene esikhundleni, kangifuni nokucabanga ukuthi kungenzeka naye angijikele njengoZuma.