Ngavinjwa ngingena emhlanganweni
MHLELI: Ngivumele ngithule indumalo enginayo ngendlela engibona kubulawa ngayo uKhongolose.
NgeSonto ngo-Okthoba 22 u-ward 96 KwaZulu-Natal esifundeni saseThekwini ubunomhlangano wamalungu e-ANC (BGM) kuyokhethwa izithunywa ezizoya engqungqutheleni yokukhetha ubuholi ngoDisemba.
Ngathuka kwaphela nasozwanini ngifika esangweni ngivinjwa yiphoyisa lakwaMetro lithi angivukmelekile ukungena ngaphakathi kepha yilona elithatha amapasi abantu liyobheka kwi voters roll ukuthi bayavela yini bese libuya likutshela ukuthi igama lakho likhona yini noma alikho kwivoters roll.
Amaphoyisa akwaMetro EThekwini ayegcwele ngaphakathi kwamasango ehholo amanye engaphakathi ehholo uqobo kodwa amalungu kaKhongolose anobulungu evalelwe ngaphandle kwamasango okuyinto engavumelekile ngokwenqubomgomo yenhlangano.
Siyofisa ukuthi ubuholi obungaphezulu bungenelele kulezi zinkinga yize-ke kwaziwa ukuthi abanye babaholi yibo kanye abaqhuba lo mkhankaso wokubulala inhlangano ngoba bezama ukuvikela izisu zabo.
Ngimfonele uNobhalaJikelele, uMnuz Gwede Mantashe (osesithombeni), ngimbikela ngako konke okwenzekile wathi ucela into ebhalwe phansi ngamthumelela nombhalonyazi (email) kepha anginathemba lokulungiseka kwale nto ngoba kwayena uhlale esaba uma kumele alungise izinkinga zombutho.
Ngibhala loku njengelungu likaKhongolose elisesimeni esihle ngisebenzisa ilungelo lami elikuMthethosisekelo wezwe lokukhuluma ngokukhululeka. Siyabonga “Msholozi” Gcabashe. EMBUMBULU