UPitso uthembele kuMdali nabaphathi
UPITSO Mosimane usebeke konke ezandleni zabaphathi bebhola eNingizimu Afrika nezoMdali njengoba esalokhu ebalise njalo ngezinqumo zonompempe ezenzeke emidlalweni emibili edlule, iMamelodi Sundowns elahle kuyona amaphuzu kwi-Absa Premiership.
ISundowns izoya kwiChippa United ngeSonto emdlalweni weTelkom Knockout Last 16 eSisa Dukashe Stadium, eMdantsane, ngo3.30 ntambama.
Izofika izikhotha amanxeba ngemuva kokuhlulwa iKaizer Chiefs naMaZulu FC, yomibili imidlalo ephele ngo 2-1.
Ekhuluma nabezindaba izolo emahhovisi ePremier Soccer League (PSL), uMosimane uvumile ukuthi kumele balungise udonga lwakhe kodwa waphinde wabalisa ngezinqumo zonompempe. Emdlalweni weChiefs ubekhalela ukungakhishwa ngekhadi elibomvu kukaJoseph Molangoane owakhahlela uKhama Billiat. KowaMaZulu ubalule amaphenathi amabili athe wancishwa wona negoli likaSiyabonga Nomvethe athe walishaya esemhlabeni ongafanele.
Onompempe ababephethe imidlalo, uChristopher Harrison noDaniel Bennett ngokwehlukana.
“Sasiwuphethe umdlalo kwiChiefs kodwa sibuthuntu. Asizange sikwazi ukugqobhoza udonga lwabantu abahlanu. KuMaZulu, ngiyayithanda indlela ebesihlasela ngayo kodwa samosha amathuba. Kumele ngisebenze nasekubuyiseni ukuzethemba kubadlali, siqinise ekuhlaseleni nasemuva.
“Okunye sizokuyekela ezandleni zePSL, iSafa noMdali. Kodwa uma ngikhuluma iqiniso kumele silungise emuva ngoba ekugcineni singenelwe amagoli amane emidlalweni emibili,” kusho uMosimane.
Yize ekhulume kanje uthe akasafuni ukugxeka onompempe, ufuna ukugcina irekhodi lakhe leminyaka emibili engabhekani nekomiti eliqondisa ubugwegwe.
Mayelana nomdlalo neChippa ulindele onzima futhi ohlukile njengoba isiqeqeshwa uTebogo Moloi futhi bazofika kuyona ibuya ekushayeni iCape Town City koweligi ngempelasonto edlule.
“KuTebogo abaligcini kakhulu ibhola. Ngiyamazi ufuna lisheshe lifike ebhokisini.
Kuzomele siqaphele uLerato Manzini, Mark Mayambela noKurt Lenjties bayingozi.”
Uthe uKhama Billiat usebuyile, u-Anthony Laffor akakakulungeli ukudlala, uCuthbert Malajila kade eyohlinzwa.
Ubongele iSuperSport United ngokufinyelela kowamanqamu weCAF Confederation Cup. Ukhale ngokungashayelwa ihlombe kwephini lomqeqeshi we-United, uKaitano Tembo.
“Hhayi ngoba ngingamboni u-Eric Tinkler onqobise iqembu umdlalo kodwa uKeitano ulifake kowamanqamu. Wahamba yedwa kwiMazembe, wabuya. Nalapha ekhaya ube yedwa. Nguyena ofake iqembu kowamanqamu,” kusho uMosimane. Imidlalo yeTelkom Knockout Last 16:
Namuhla: Maritzburg United v Platinum Stars (Harry Gwala Stadium, 8pm)
Kusasa: Golden Arrows v Orlando Pirates (Princess Magogo Stadium, 3.30pm); Polokwane City v Ajax Cape Town (Old Peter Mokaba Stadium, 3.30pm); Bloemfontein Celtic v SuperSport United (Dr Molemela Stadium, 6pm); Bidvest Wits v Free State Stars (Bidvest Wits, 8.15pm); Kaizer Chiefs v AmaZulu (Moses Mabhida Stadium, 8.15pm)
NgeSonto: Baroka FC v Cape Town City (Peter Mokaba Stadium, 3.30pm); Chippa United v Mamelodi Sundowns (Sisa Dukashe Stadium, 3.30pm)