Yengezwe ubuhle iRenault Kwid
ABANTU abajimayo bayathanda ukuthi imizimba abasuke sebenayo ngehlobo futhi abanganqeni ukuyiveza ngenxa yokuthi isuke ilolongekile bayenza ebusika.
Kusho ukuthi babe nalowo mqondo kwaRenault ngoba kwethwese ihlobo nje, bavele bethula kabusha umncanyana wabo iKwid isihluke kakhulu indlela ebukeka ngayo.
Lo mncanyana ungenye yezimoto ezenza kahle emakethe kule nkampani njengoba selokhu wethulwa ekupheleni konyaka odlule sekudayiswe angaphezulu kuka-6 000.
IKwid Xtreme ifika kuleli ngesibalo esikaliwe okuyenza ibe ngeyekhethelo. Ngaphandle ishaya ngengaphambili eligqize ngechrome ezindaweni eziningi njengakwi-grille, kuma-fog lamps nasezansi kukabhampa. Nangemuva ngezansi kwesivalo ikhona le chrome.
Baphinde bayigaxa namabheshu kanjalo namaroof rails okhakhayini. Uma uyibuka inenswebu yeSUV kanti wumncanyana.
Okuphinde kuhluke ngayo kuneKwid eyejwayelekile wukuthi yona ishaya ngamarimu ahlukile angu-14”.
Uma ungena ngaphakathi igabe ngeMediaNav navigation/ multi-media system engu-7 inch touchscreen. Ukwazi ukudlala umsakazo nokuxhuma iselula ngeBluetooth.
Izihlalo zayo zikwazi ukulayisha abagibeli abayisihlanu kanti ibhuthi lilayisha impahla engu-300 litres.
Izihlalo zangaphambili uyakwazi ukuzihlela ukuthi zime kanjani, inamawindi asebenza ngogesi ngaphambili, air-conditioner futhi inezindawo zokubeka izigubhu ezingu-1 litre ezicabheni zangaphambili.
IRenault Kwid Xtreme ishaya ngenjini engu-1.0 litre Smart Control efficiency (SCe) enamagiya ayisihlanu ashintshwayo.
Ikhiqiza amandla angu-50 kW netorque engu-91 Nm.
Ngebanga lika-100km/h iphuza amalitha angu-4.7 kaphethroli.
Ngakwezokuphepha iphuma ne-airbag yomshayeli, amabreak lights angemuva aphezulu ukuze osemva kwakho akubone ne-electric power steering.
Renault KWID Expression 1.0litre SCe R 124 900
NEW Renault KWID Dynamique 1.0-litre SCe R 134 900
NEW Renault KWID Xtreme 1.0litre SCe R 149 900
Zonke ziphuma ne-warranty yeminyaka emihlanu noma ibanga lika-150 000km, i-anti-corrosion warranty yeminyaka eyisithupha. I-service plan uyifaka uma uthanda kanti kumele uyise kwisevisi njalo ngemuva kwebanga lika-15 000km.