Uthakaselwe umbukiso wamaBMW
BAKHOMBISE ukuwuthakasela abantu umbukiso wokuqala ngqa wezimoto zakwaBMW, iBMW M Festival, ebiseKyalami Grand Prix Circuit, eGoli, ngempelasonto.
Lo mbukiso uqale ngoMgqibelo waze wasongwa ngeSonto. Uhehe izethameli ezingaphansi kancane kuka-20 000, ngokukaBMW.
Abezindaba nokho bathole ithuba lokuwuthamela ngokukhethekile ngoLwesine lapho bevivinye khona izinhlobo zezimoto ezahlukene zale nkampani.
Kukhonjiswe okokuqala kwelengabadi iBMW M5 entsha ezotheleka ngasekuqaleni konyaka ozayo.
Leli bhanoyi laphansi lishaya ngenjini engu-4.4 litre eyiV8 bi-turbo eneM TwinPower Turbo technology.
Ifuqa amandla angu-441 kW netorque engu-750 Nm. Ukusuka ku-0 iye ku-100km/h kuyithatha kuphela imizuzwana engu-3.4 kanti ukusuka ku-0 iye ku-200 km/h kuyithatha engu-11.1.
Ijubane layo elikhulu limiswe ku-250 km/h kodwa uma ineM Driver’s Package lifinyelela ku-305 km/h.
Abekhona wonke ama-M5 kusukela kweyesizukulwane sokuqala kuze kufinyelele kwesesithupha nokuyiyo ezoqala ukudayisa ngonyaka ozayo.
Baphinde basebenzisa lo mbukiso ukukhombisa iBMW X3 entsha ezokwethulwa ngokusemthethweni ngenyanga ezayo.
Bekukhona iX3 M40i okungeyokuqala ngqa ukugaxa ibheji leM Performance. Sizobika kabanzi ngayo uma isiyethuliwe kodwa ukukha phezulu, inenjini engu-3.0 litre M Performance six-cylinder in-line engine. Ifuqa amandla angu-265 kW kanti ukusuka ku-0 iye ku-100km/h kuyithatha imizuzwana engu-4.8.
I-X3 izokhiqizwa embonini yakwaBMW, iPlant Rosslyn, ePitoli ekuqaleni konyaka ozayo.
Ezinye izimoto yi-2 series ethuthukisiwe kanjalo ne-6 Series GT.
Bekukhona neBMW 7 Series Individual (750Li) by Esther Mahlangu ukuze abantu bayibone nezinye izinhlobo zakwaBMW.
Kuphinde kwafika nomshayeli weDTM eqenjini lakwaBMW iTeam RBM, uTom Blomqvist, othe ukuzula enkundleni nabantu.
Ngaphandle kwezimoto, ngempelasonto izethameli ziphinde zazitika ngomculo kwazise bekunobhazabhaza wesiteji lapho bekushiyelana khona inkundla uDJ Martin, Alex Schulz nabanye abaningi.