Kugqugquzelwa abe-kwaito ukuthi bangenele amaSama
ISIKHULU seRecording Industry of South Africa (RISA) eyengamele amaSouth African Music Awards (Sama), uNhlanhla Sibisi, sigqugquzele abaculi be-kwaito ukuthi bangenele imiklomelo ngoba sincane isibalo sabangenelayo.
“Umkhankaso esiwuphushayo owe-kwaito ngoba imingenelo yakhona iya ngokwehla. Sigqugquzela bonke abaculi ukuthi bangenele. Esikubonile wukuthi abaningi bakhipha izingoma ezihamba ngazodwa. Abangenele eminxeni efanele,” kusho uSibisi.
Uthe emunxeni weBest Kwaito kufuneka abaculi abakhiphe ama-albhamu.
Izolo kuvulwe ukuthi abaculi sebengaqala bangenele uma befuna ukuba yingxenye yemiklomelo yangonyaka ozayo nokuzoba ngeka-24 selokhu yaqala.
Njengoba ukungenela kuvulwe izolo kuyoze kuvalwe ngoJanuwari 31 ngonyaka ozayo.
Abaculi abavumeleke ukungenela eminxeni engaphezulu kuka-25 ngabakhiphe phakathi kukaFebhuwari 1 kulo nyaka noJanuwari 31 wonyaka zayo.
“Nyakenye sithole imingenelo engaphezulu kuka-700. Kulokhu sifuna ukuphusha sithole engaphezulu kuka-800,” kuchaza uSibisi.
Ngemuva kokuvalwa kokungenela, kuyobe sekuhlunga amajaji bese kusala abahlanu umunxa ngamunye.
Abanqobile bazomenyezelwa ngonyaka ozayo emcimbini ongakaqinisekiswa ukuthi uzoba kuphi futhi nini.
Emcimbini wanonyaka kwakhonya umrepha uKwesta njengoba agoduka nezindondo zeSAMRO highest airplay of the year, The Best Rap Album, Best Male Artist Of The Year, Best Album Of The Year neBest Collaboration ngeNgudu.
UDr Malinga wathola eyeBest Kwaito. ushonile.
Indaba yokushona kukaMroza isabalalise okomlilo wequbula ezinkundleni zokuxhumana izolo ekuseni. Abantu bebebuza ukuthi ushone ngempela yini njengoba bese kushiwo kanjalo.
Lokhu kulandela ukuthi uMroza eyiswe enyangeni emasontweni amabili edlule ngemuva kokuba etholwe eselahlekelwe yingqondo eCarltonville, eGoli, futhi eshayiwe.
Uyise omncane, uMnuz Moso Fakude, uthe abantu banamanga, uMroza uphila saka.
“Inkinga ngabantu wukuthi bayathanda ukubukwa ngezinto ezingathi shu. UMroza uyaphila futhi sekuphele isonto esindile. Usebuyele nasekhaya. Nawe ungamthinta enambeni yakhe akuchazele. Nasemsakazweni Ukhozi FM ohlelweni iVuka Mzansi Breakfast Show uMroza ukucacisile ukuthi uyaphila,” kusho uFakude.
Ethintwa uMroza, ocingweni lwakhe, owesilisa oluphendulile novumile ukuthi unguMroza, akazwakalanga njengomuntu ongaphilile kodwa wakhala ngokuthi usemgwaqweni uyashayela ucela ukubuye athintwe.
“Ngicela ungithinte ngemuva kwamahora amathathu, inkinga yami wukuthi ngisemgwaqweni ngiyashayela,” kusho ophendule ucingo maqede waluvala.
Esethintwa ngemuva kwesikhathi asishilo ubengasalubambi ucingo. Ku-Facebook kuke kwavela negama leMeya yaKwaHlabisa, uMnuz Velenkosini Hlabisa othe: “Ibuhlungu le nto eyenzekile.” Ubephawula ngaphansi kombhalo okuFacebook kaXolani Mashimane Ngwezi othe uMkhanyakude District ufe olwembiza ngokudlula emhlabeni kukamaskanda owaduma ngekaVan Damme waba ngowokuqala ukunqamula unyaka ngalolu hlobo lomculo. UHlabisa ukuchithile ukuthi ubeqinisekisa indaba yokushona kukaMroza.
“UMroza uyaphila futhi sengikuqinisekisile lokho. Ngiphawule kuFacebook ngenxa yokwethuka ngoba udaba lukaMroza nokungaphili kwakhe belubikwa ezindabeni. Ngalokho bengingasho ukuthi sengiyakuqinisekisa okushiwo ngaye,” kusho uHlabisa.
Emasontweni amabili edlule uMroza ubesuke ekhaya eya koqopha eGoli. Ulahleke ngosuku lwesibili emqashweni wentombi yakhe aphume kuwona ethi uya ekhaya wagcina engafikanga.
Umndeni umthole usufonelwa amaphoyisa aseCarltonville, eGoli, kuthiwa uboshwe engena ngejubane kwelinye lijalidi eGoli.