Umnyango nengwiji kothisha bezidudla
USUSHAYE ungqimpothwe uMnyango wezeMfundo KwaZulu-Natal ngokuqashwa kothisha abashaya isidudla.
Umnyango ukhiphe isekhula ethi othisha ababeshaye isidudla izinkontileka zabo ezanqanyulwa, ngemuva kokuphuma kwesekhula eyayithi inhloko yomnyango yiyona okumele igunyaze ukuqashwa kwabo kabusha, ababuyele ezikoleni.
Leyo sekhula yasusa umsindo, izinyunyana zothisha zithi iphikisana neyoMnyango wezeMfundo kuzwelonke ethi uthisha osekuphele unyaka esulile emsebenzini, unelungelo lokuqashwa kabusha.
Inyunyana yothisha iNatu yafaka umnyango enkantolo ngamacala angu-27 othisha, ethi banqanyulelwa izinkontileka ngokungemthetho kulandelwa le sekhula.
ISadtu ngenyanga edlule ibe nombhikiso ikhala ngezinto eziningi. Eqhulwini lazo ibikhala ngokungaqashwa kothisha abashaya isidudla. Yanqumela umnyango ugwayi katiki ithi ucacise ngalolu daba, engakapheli amasonto amabili uthole izikhalo.
Izolo, iphini likanobhala weSadtu esifundazweni, uMnuz Bheki Shandu, lithe umnyango usukhiphe isekhula ethi othisha ababeshaye isidudla bakhahlelwa wuhlelo, ababuyele ezikoleni okwanqanyulwa izinkontileka zabo besebenza kuzo.
UShandu uthe le sekhula ithi othisha abase beqashiwe kodwa amaphepha abo engakaphothulwa, ababuyele ezikoleni abase beqalile ukusebenza kuzo futhi bazokhokhelwa isikhathi abase besisebenzile ngesikhathi kufika isekhula ethi yinhloko yomnyango enegunya lokubaqasha kabusha.
Uthe le sekhula bayithokozele kakhulu ngoba bebelokhu benesikhalo ngothisha abase benezinyanga besebenza, kwafika isekhula eyayibachitha.
“Kunothisha abase benezinyanga besebenza ngesikhathi kuphuma le sekhula. Uhlelo lwabo lokuthi baqashwe kabusha lwasala lulenga, bangakhokhelwa nemali yabo. Le sekhula yakamuva icacisa kahle ukuthi kumele kwenzekeni,”kusho uShandu. UMnuz Kwazi Mthethwa okhulumela uMnyango wezeMfundo KwaZulu-Natal uthe ikhona isekhula enjalo kodwa ngeke ande kakhulu ngokuthi ithini. Uthe akufonelwe uMnyango wezeMfundo kuzwelonke ngayo. UMnuz Elijah Mhlanga okhulumela uMnyango wezeMfundo kuzwelonke uzihlangulile kulolu daba, wathi le sekhula eyesifundazwe. Ekazwelonke ithi uthisha osekuphele unyaka esulile angaqashwa kabusha. UMnuz Allen Thompson weNatu uthe le sekhula iqonde ukulungisa iphutha elalenziwe esifundazweni. “Isifundazwe asikwazi ukuzakhela umthetho waso, kumele silandele umthetho obekwe ezweni lonke. NgoMsombuluko othisha bethu ababenqanyulelwe izinkontileka ngokungemthetho bazoya ezikoleni. Uma bexoshwa sizoqhubeka nokubopha umnyango ngalolu daba,”kusho uThompson.