Intukuthelo kubazali kubhikishelwa uthisha
KUPHAZAMISEKE ukufunda izolo esikoleni, iMcopheleli Primary, KwaDabeka othisha bebhikishela uthishanhloko wesikole otholakale emsulwa emacaleni abesolwa ngawo.
UMnuz Themba Mazibuko obuye abe nguNobhala weSadtu eDurban South Region, ubesolwa ngokudedela izintombi zakhe ezingothisha abafundisa kulesi sikole, zizenzela umathanda kugcine kuphazamise ukufunda.
UMazibuko ubemisiwe emsebenzini ukuze ithimba labaphenyi bomnyango likwazi ukwenza umsebenzi walo. Ithimba lithole ukuthi alikho icala ngoba izinsolo azibambeki.
Othisha abangenelisekile ngomphumela walolu phenyo uthe efika babe bephuma emakilasini, bama ngaphandle kwesango bethi abamfuni esikoleni.
Ngemuva kwesikhashana bebhikisha ngaphandle kwesango kutheleke abazali nabo baqala owabo umbhikisho, bethi othisha abangafuni ukusebenza abahambe, bahlukane nothishanhloko ngoba akanacala. Abanye othisha abangamalungu eSadtu abangafundisi kulesi sikole bebegcwele ngaphandle kwesikole bezokweseka uMazibuko.
Usihlalo wesigungu sabazali uMnuz Ngcobo, ongathandanga negama lakhe uthe: “Ngizobheka ukuthi kwenzekani. Njengamanje sisalinde ukuthi umnyango ukhulume nothisha okuyibo abebebhikisha,” kusho yena.
Kubazali abebebhikisha akekho obefuna ukuphumela obala ngokuthi kwenzekani bebelokhu bethi othisha abakhala ngothishanhloko bayizishimane.
UMnuz Scelo Khuzwayo okhulumela umnyango esifundazweni uthe bayakugxeka ukuziphatha okuholela ekutheni kungalandelwa umthetho. “Asifisi ukuthi kube nokuphazamiseka kwabafundi njengoba sekuqale izivivinyo zokuphela konyaka. Ihhovisi lo mnyango liyile kulesi sikole lakhuluma nothisha. Sicabanga ukuthi lulungisekile udaba,” kusho uKhuzwayo.
Omunye wothisha abebebhikisha ongathandanga ukudalulwa uthe abanelisekile ngophenyo kodwa bayamukelile incazelo yomnyango. UMnuz Bheki Shandu oyiphini likanobhala weSadtu esifundazweni uthe bayajabula ngemiphumela yophenyo lwethimba lomnyango.