Usomatekisi obulewe ubevele esongelwa ngokufa
UMNDENI kasomatekisi obulewe nabantu abangu-11 uthi ngabe kungcono ukube kubulawe yena kuphela ngoba bafele ubala othisha nabebehamba nalo somatekisi.
UMnuz Muzikayifani Ngobese (64), odutshulwe ngoLwesibili kuvele ukuthi ubesehlala ngokucasha kuhle kwenyamazane ngenxa yezinsongo zokubulawa futhi ubesalapha amanxeba okudutshulwa kwangoSepthemba nonyaka.
UNksz Joyce Ngobese okhulumela umndeni uthe izinhliziyo zabo zibuhlungu kakhulu ngokuthi sekuze kwafa inqwaba yabantu ngenxa yokuhlaselwa komfowabo.
“Besikulindele vele ukuthi angahlaselwa noma yinini umfowethu ngoba ubengumuntu osatshiswa ngokubulawa ngamaSMS futhi ubesanda kudutshulwa ngoSepthemba nonyaka. Ubesehlala ngokugadwa ngoba etshelwa ukuthi uyafunwa ababulali. Okusidumaza kakhulu wukuthi kushone nemiphefumulo engenacala, othisha nabebehamba nomfowethu kabangene kulokhu kuhlaselwa kwakhe. Siyazwelana kakhulu nemindeni yabalahlekile kulesi sigameko,” kusho uNksz Ngobese.
Uthe umufi ngelanga lesigameko uvuke wadla isidlo sasekuseni, wabe eseyokhipha izimbuzi esibayeni.
Ubezohamba namakhosikazi akhe oNkk Sibongile “MaZungu” Ngobese noBusisiwe “MaHlomuka” Ngobese baye edolobheni ukuyobheka imoto eyalimala ehlaselwa ngoSepthemba.
“Ugcine ewashiya amakhosikazi akhe ngoba ethi ngeke baphephe ngoba uyazi ukuthi bafuna ukumbulala. Uhambe nendodakazi yakhe uNozipho ngoba ubephuthuma edolobheni,” kusho uNksz Ngobese.
Emotweni ebilethwe usoseshini waseKlipriver beyiphini likasihlalo kuwo umufi, bekukhona abaqaphi ababili, umshayeli, indodakazi naye lo somatekisi.
Uthe bese kuyimpilo yakhe umfowabo ukuba alandwe onogada baphinde bambuyisele ekhaya.
Ngokusho komndeni basola wona umbango ematekisini yize bengawazi umsuka wempi.
Isolezwe lithole ngosondelene nalo somatekisi ukuthi ubenyamanambana kwabanye abanikazi bamatekisi ngoba ubelishumayela ivangeli lokuba nezincwadi ezisemthethweni zokusebenza emzileni waseKlipriver.
UNgobese ubenetekisi eyodwa ehambela endaweni yaseMatiwane nezinye eziseduze kwakhona.
UNozipho unezingane ezimbili, enye ifunda uGrade 10 eMasayi Secondary, okufundisa khona uthisha uNksz Mavimbela oshone kule nhlekelele.
Umndeni walo somatekisi uthe uyafisa abasolwa kulesi sigameko baboshwe.
UNgobese kuvele ukuthi unezingane eziyisishiyagalombili abezondla ngawo lo msebenzi wasematekisini.
UNgobese waqala engumshayeli kule mboni, wabuye wawuyeka umsebenzi. Uneminyaka ecela kwengu-10 ebuyile ematekisini ngoba eseneyakhe itekisi. “Sife olwembiza ngoba uyena obondla, eyikho konke lapha ekhaya. Kumanje sisaphithene amakhanda ngalesi sigameko esisihlukumeze kakhulu. Ikakhulukazi ukulahleka kwemiphefumulo eminingi kangaka, siphela umoya impela,” kusho uNksz Ngobese. Omunye unogada ofile kule ngozi kuvele ukuthi nguMnuz Mkhize (igama alitholakalanga), ubesehlala kwaNgobese ukuze amgade. Abanye abebesevenini abafile kuvele ukuthi oMnuz Buyani Gama noNgcobo (igama alitholakalanga). Bebengena bededelana omakhelwane izolo bezobhonga emswaneni, nesililo besiqhuma phezulu kulo muzi.