Senyukile isibalo sabafe kubulawa ngesihluku isikhulu samatekisi
SESENYUKE safinyelela kwabangu-12 isibalo sabafe ngemuva kwesigameko esihlasimulisa umzimba esenzeke eMnambithi ngoLwesibili.
Okhulumela amaphoyisa KwaZuluNatal uColonel Thembeka Mbhele ukuqinisekisile izolo ukuthi kukhona omunye ka-12 kodwa ibingakatholakali imininingwane yakhe.
Okuvelile wukuthi ungomunye wabebengeniswe esibhedlela belimele kwabebegibele itekisi.
Isigameko sishiye kukhalwa njengoba kuvela ukuthi omunye uthisha waseMatiwane Primary uqulekile waphuthunyiswa esibhedlela ngemuva kokuzwa ukuthi abangani bakhe abathathu abangothisha bafile. Isimo besimuncu izolo kuzo zombili izikole ezingomakhelwane, iMatiwane neMasoyi Secondary njengoba kufe abasebenzi abane boMnyango wezeMfundo.
Abanye othisha nabafundi bebetshelwa okokuqala izolo emthandazweni ngokudlula emhlabeni kothisha.
EMatiwane kufe uNksz Khethenjani Thwala (45) obengunobhala, uNkk Zandile Dlamini (48) noNksz Bonisiwe Ziqubu. EMasoyi kube nguNksz SM Mavimbela.
UNgqongqoshe Mthandeni Dlungwane woMnyango wezeMfundo esifundazweni ohambele izikole, uthe sinzima kakhulu isimo ababhekene naso.
“Njengoba kuquleke uthisha waze wayiswa esibhedlela, kukhomba ngokusobala ukuthi siphazamise wonke umuntu lesi sigameko. Sidumele kakhulu siwumnyango ngokwehlile. Yisikhathi sokubhala manje, yize kube nokuphazamiseka kancane kodwa kuyaqhubeka ukufunda,” kusho uDlungwane.
EMasoyi, u-matric ububhala isiZulu izolo, namanye ama-grade abebhala izivivinyo.
Umfundi ongeke adalulwe utshele Isolezwe ukuthi kunzima nokuqhubeka nokubhala ngenxa yokushonelwa ngothisha.
“Izinhliziyo zethu zibuhlungu ngesigameko esisivelele. Uthisha wethu besimkhonze kakhulu. Nabanye othisha babesifundisa emabangeni aphansi. Kunzima nokubhala,” kusho umfundi.
Imindeni yothisha abafe engozini ihlangane nongqongqoshe izolo ezoyiduduza.
UNkk Nomusa Nkehli ongudadewabo kaNkk Dlamini, uthe uqale waqamba amanga ezinganeni nasemndenini wathi usesimeni esibucayi yize ephelele esendaweni yesehlo.
“Bengingazi ukuthi kumele ngithini ezinganeni zakhe nasemndenini ngoba bebelinde ukuba abuye ekhaya ephila. Ngivele ngathi ise-ICU. Udadewethu ubengumuntu okholwayo ozithulelayo. Izingane zakhe bezisamdinga. Kubuhlungu okwenzekile,” kusho uNkk Nkehli.
UNkk Stompi Khoza ukhale esifanayo ngengane kamfowabo uNksz Thwala.
“Sifile nathi ngokushona kwale ngane ngoba yiyona ebiyenza yonke into ekhaya. Ushiye ingane esenyuvesi, nenye encane. Asazi nokuthi sizoqalaphi ,” kusho uNkk Khoza.
Labo thisha bebenemizi eMnambithi begibela ngo-R18.50 itekisi ibabeke ezikoleni. Abaningi bebenezimoto abebezishiya edolobheni bese begibela itekisi.
Etekisini abebehamba ngayo kuvele ukuthi omunye ofile yilungu lomphakathi lesilisa, umshayeli nomunye obekungakacaci ukuthi ungubani. Isolezwe liye emahhovisi kasoseshini waseKlipriver izolo ukuzwa ukuphawula ngesigameko kodwa kwathiwa usihlalo akekho futhi ucele ukuba inombolo yakhe inganikezwa muntu.
Beziqinile ezokuphepha eMnambithi noma uphuma ngaphandle.