UJordaan uchitha izinsolo zokudlwengula
UMENGAMELI weSafa , uDkt Danny Jordaan usegcine ephumele obala wachitha izinsolo zokudlwengula abekwe zona ngowayeyilungu lePhalamende le-ANC, uNksz Jennifer Ferguson.
UJordaan ubengakaze aphawule ngalolu daba selokhu asolwa nguFerguson ngenyanga edlule enkundleni yokuxhumana uFacebook.
Esitatimendeni esithunyelwe izolo ummeli kaJordaan, uNkk Mamodupi Mohlala-Malaudzi, uthe ukuthula kukaJordaan isikhathi esingaka bekuyindlela yakhe yokuzwelana nomgilwa ophumele obala ngenyanga edlule ezinkundleni zokuxhumana ngokuthi wadlwengulwa.
UNkk Mohlala-Mulaudzi uveze ukuthi ngemuva kokudla amathambo engqondo ngalolu daba uJordaan ubone sekuyisikhathi esihle sokuthi aphawule ngalo.
“Noma uDkt Jordaan evumelana ngokubaluleka kwezinkulumo ezenzeka esidlangalaleni emphakathini ukuze kuvele obala izigameko zokuhlukunyezwa kwabantu ngokobulili, kulolu daba nokho kunezinhlangothi ezimbili ezingeke zixazululwe abezindaba noma kwenye indawo ngaphandle kwenkantolo,” kusho isitatimende esithunyelwe yiMohlala Attorneys.
“Ukudingidwa kwalolu daba ngaphandle kwenkantolo, njengokwesiphakamiso sikaNksz Ferguson kungenza kubukeke sengathi kunokuthize okufihlwayo. Kungaphinde futhi kubeke isithombe sokuthi abasezikhundleni eziphezulu babhekana nengalo yomthetho ngendlela ehlukile kunabanye
“Njengabameli bakhe siyalele uDkt Jordaan ukuthi angazibandakanyi enkulumeni engaphandle kwenkantolo ngasolwa ngakho nguFergeson. Ngokwezomthetho, izinsolo abekwe zona zingadingidwa enkantolo kuphela, lapho kuzovikeleka khona izinhlangothi zombili.”
UNksz Ferguson usola uJordaan ngokumnukubeza ngokocansi ngo-1993 ehhotela elisePort Elizabeth. Ohlelweni lwezemidlalo emsakazweni iRadio 702 ngoLwesibili kuphinde kwaphumela obala abanye besifazane ababili abasole uJordaan ngecala elifanayo.
Ummeli kaJordaan unqabile ukuphawula ngabo wathi ngeke akhulume ngabantu angabazi.