Owezokuthutha uphendula abamsola ngokufa ematekisini
UNGQONGQOSHE wezokuThutha nokuPhepha KwaZulu-Natal, uMnuz Mxolisi Kaunda uthi kuyishwa ukuthi osomatekisi namaqembu aphikisayo basola yena ngokubhubha kwabantu abangu 12, eMnambithi ngoLwesibili.
Umholi weDA KwaZulu-Natal uMnuz Zwakele Mncwango usole uKaunda ngokuba nesandla ekufeni kwabantu eMnambithi, wathi ubazi ngokushuba kwesimo embonini yamatekisi eMnambithi kodwa wangenza lutho. Okhulumela uKaunda, uMnuz Mluleki Mntungwa, uthe kuyishwa futhi kuyiphutha ukuthi kuthiwe ungqongqoshe unesandla ekufeni kwabantu eMnambithi. “UNgqongqoshe kusukela engenile esikhundleni indaba yeseMnambithi uyisukumelile yaze yadamba njengoba isiqubuka manje sekwenzeka lesi sigameko. Nangesonto eledlule umhlonishwa ube khona kule ndawo eyokhuluma nosomatekisi,” kusho uMntungwa.
Uthe uKaunda wenza konke okusemandleni ukuthi alungise isimo kule ndawo. Usomatekisi oyilungu likasoseshini iKlipriver eMnambithi oshayele emahhovisi eSolezwe izolo ekhala mi izinyembezi, usole uKaunda wathi igazi labantu ababulewe kumele libuzwe kuyena.
“Kunjena yingenxa kangqongqoshe. Kade sizama ukukhuluma naye, uyasibalekela uthi ubhizi,” kusho usomatekisi ocele ukungadalulwa ngoba esaba ukulekwa ngesoyi. Usole uKaunda ngokuchema nomdeni othile odumile eThekwini osembonini yamatekisi.
“Kunonogada abatshalwe emarenki. Labo nogada basebenzisana nalo mndeni osatshwayo. Bafika emarenki bakhiphe amatekisi abantu abathile abangafunwa,” kusho usomatekisi.
Uthe izikhulu zomnyango ezihloniphekile zigwazisa osomatekisi ukuze zibanike izimvume zokusebenza.
“Labo abakhala ngezinsolo zokugwazisa kumele bayozibika emaphoyiseni uma benobufakazi,” kusho uMntungwa.