Kuhlukene imibono kubahlaziyi ngesiphakamiso sikaZuma
KUHLUKENE imibono kubahlaziyi bezombusazwe mayelana nesiphakamiso sakamuva sikaMengameli Jacob Zuma mayelana nokusungulwa kweKhomishini ezophenya ngezinsolo zokugwamandwa kwamandla ombuso.
Muva nje uZuma uveze ukuthi uzoyisungula iKhomishini kodwa yena ngeke avele kuyona.
Umengameli uthembise ukuthi iKhomishini uzoyisungula zingakapheli izinsuku ezingu 30.
Umhlaziyi wezepolitiki ozimele, uMnuz Ralph Mathekga uthi lena indlela kaZuma yokubalekela ukuphenywa.
“Ubufakazi buvelile obuqinisa izinsolo ezithi umengameli uyathinteka odabeni lokuqhagwa kwamandla ombuso,” kusho uMathekga.
Omunye umhlaziyi wezepolitiki ozimele, uMnuz Thabani Khumalo uthe mhlawumpe sekuyisikhathi sokuthi izwe libuyekeze amandla anikwe umengameli.
“Kulokhu ngicabanga ukuthi sekukhona ukungawuhloniphi umthethosisekelo wezwe ngasohlangothini lukamengameli,” kusho uKhumalo.
Uthe uZuma kumele avele phambi kweKhomishini ukuze ageze igama lakhe.
“Igama lakhe liyathinteka ezinsolweni zokuqhwagwa kwamandla ombuso ukungaveli kwakhe kwiKhomishini kuzoshiya imibuzo engaphendulekile,” kusho uKhumalo.
Uthe uZuma kumele ayeke iNhloko yamaJaji uMogoeng Mogoeng ukuthi kube iyona esungula iKhomishini.
“Akumele kuphindeke esifanayo nakwiKhomishini kaSereti eyayiphenya ngokuthengwa kwezikhali ayasungulwa nguyena umengameli Zuma yagcina ingaphumanga nalutho ngoba kwayena umengameli wayethinteka,” kusho uKhumalo.