Izinkinga ze-ANC zaqala ePolokwane -Dkt Mkhize
UMGCINIMAFA we-ANC uDkt Zweli Mkhize uthi izinkinga zokwehlukana kwi-ANC zaqala engqungqutheleni yasePolokwane ngo-2007 lapho uMengameli Jacob Zuma ahlula khona uMnuz Thabo Mbeki.
UMkhize, osembangweni wokuhola i-ANC ngoDisemba, uthe kule ngqungquthela yango-2007 ilapho kwaqala khona ukwehlukana.
Esidlweni sasekuseni nezintatheli izolo eThekwini, uMkhize uthe ukuyisana ezinkantolo, izinxushunxushu ezingqungqutheleni nombango emihlanganweni yamagatsha ngezinye zezinto okudingeka zilungiswe ngaphambi kwengqungquthela yaseNasrec.
“Into engizisola ngayo kakhulu ngukuthi ngo-2007 ngangena kakhulu endabeni ethinta ukuhamba nohlangothi oluthile. Ngiyavuma imina owayesekhaleni lalokhu,” kusho uMkhize.
Uthe kodwa abaholi abakhethwa kuyona akazisoli ngabo.
“Selokhu sabuya kule ngqungquthela, kunezinto ezintsha ezifana nesiko ezivukayo yize sazi ukuthi azilona isiko le-ANC.
“Kulokhu kumele siye siyohlakaza indaba yezinhlangothi. Engizisola ngakho ngukuthi eminyakeni eyishumi kwadlula ingqungquthela yasePolokwane asikwazanga ukuqeda indaba yezinhlangothi nokuhlukana,” kusho uMkhize.
Uthe ukuze kulungiswe lokhu okwenzeka ePolokwane kumele iphele indaba yokuhlukana.
“Kumele sivumele amagatsha akhethe abaholi ngendlela abona ngayo. Uma senza lokhu singabe silungisa izinto ezenzeka ngo-2007. Kumele siphumele obala sisho izinto ezingahambanga kahle ikakhulu thina esasihamba phambili endabeni yezinhlangothi,” kuqhuba uMkhize.
Ebuzwa ukuthi uzokwenzani uma engakhethwa ngoDisemba, uMkhize uthe: “Amagatsha akhethe abafuna bangene esikhundleni sikamengameli ngakho sizolinda wona aze asho ukuthi afuna bani.”
Ingqungquthela iqala ngo-16 kuya ku-20 Disemba eGoli.