‘Qinisani isitilobho kwabangezi ePhalamende’
IPHINI likaMengameli wezwe, uMnuz Cyril Ramaphosa, linxuse iPhalamende ukuthi aliqinise isitilobho kongqongqoshe abangafuni ukuzophendula imibuzo.
URamaphosa uthe umsebenzi wale ndlu wukuthi kuze wonke umuntu azochaza ngemisebenzi ayenzayo emnyangweni wakhe.
“Nami nje ngiyeza ePhalamende ngizophendula imibuzo. Umsebenzi wenu njengamalungu ePhalamende wukuthi niqinise izinto nibabizele emihlanganweni okumele baphendule,” kusho uRamaphosa ephendula imibuzo emkhandlwini wezifundazwe izolo.
Ubephendula imibuzo yamalungu abezwakalisa ukukhathazeka ngokuthi abanye ongqongqoshe okubalwa uNksz Faith Muthambi noNksz Bathabile Dlamini abafiki kweminye yemihlangano.
Odabeni lwenkontileka phakathi kweSassa nePosi, uthe uxoxile noNksz Dlamini ngalolu daba njengoba wonke umuntu ebheke ngabomvu ukuthi kube nesivumelwano ukuze abantu baqhubeke bathole impesheni.
“Ngikhuluma nje ukhona umhlangano oqhubekayo mayelana nalolu daba lwempesheni. Wudaba sonke esilubheke ngabomvu ezweni,” kusho uRamaphosa.
Ephendula imibuzo ePhalamende izolo uNksz Dlamini uthe bazimisele ngokusebenzisana nePosi.
“Sizimisele ukusebenza nePosi ave kungukuthi asizimisele. Sifuna ukuqinisekisa ukuthi kufika isikhathi sokuthi kuqale inkontileka entsha kube sekulungiswe yonke into,” kusho uNksz Dlamini.
URamaphosa ukhulume nangomkhankaso iBlack Monday lapho abalimi babemasha bekhala ngokubulawa.
“Emamashini ayesabalele izwe lonke kwaba nababephethe ifulegi elidala lombuso wobandlululo.
“Siyethemba ukuthi bekugcina ukuthi kuphathwe leli fulegi. Umbuso wobandlululo wahlukumeza abantu,” kusho uRamaphosa.
Uthe kubalulekile ukuthi kukhuliswe umnotho emalokishini nasezindaweni zasemakhaya.