Kwenyukile ukusetshenziswa kwemali budedengu: Makwetu
UMCWANINGIMABHUKU oMkhulu, uMnuz Kimi Makwetu, uthe ukusetshenziswa budedengu kwemali kwenyuke ngo-55% kusukela ngonyaka odlule kwafinyelela ku-R45.6 billion.
Ukusho lokhu ngesikhathi ekhipha umbiko ngokusetshenziswa kwemali yiminyango kahulumeni omkhulu naleyo yohulumeni bezifundazwe ngonyaka u-2016/2017.
Ekhuluma nezintatheli izolo, uthe imali ayifaki ukusetshenziswa budedengu kwemali ezinhlanganweni i-Prasa nezinye. Uthe u-25% wezinhlangano ezifana noPrasa zivumile ukuthi zisebenzise budedengu imali kodwa zangasho ukuthi ngamalini.
Uqhube wathi ukunyuka kwemali esetshenziswa budedengu kubangwa wukuntenga kohlelo lokuthengwa kwempahla.
“Izifundazwe iKwaZulu-Natal, Free State, Limpopo ne-Eastern Cape yizona ezibangele kakhulu ukuthi kwenyuke ukusetshenziswa budedengu kwemali. Iminyango esebenzise budedengu imali owezeMfundo, owezeMpilo nowezokuThutha,” kusho uMakwetu.
Uzwakalise ukukhathazeka ngabasebenzi bakahulumeni abathola amathenda kuhulumeni kodwa bangakuvezi lokho. Uthe nakuba ungekho umthetho ovimbela ukuthi kunikezwe umsebenzi izinkampani abasebenzi bakahulumeni abanehlo kuzo kodwa kunomthetho ovimbela abasebenzi bakahulumeni ukuthi bathole amathenda kuhulumeni kusukela ngo-Agasti 2016.
“Lokhu akuqashelwa yiminyango ngoba kumele ngabe iyaqikelela ukuthi abasebenzi abenzi imisebenzi nohulumeni,.” kusho uMakwetu.