Usesaba ukuya esikoleni umfundi ‘owagilwa ngontanga’
UBHUQUZA ekhaya umfundi wesikole samabanga aphansi esiseNanda okuthiwa usesaba ukuya esikoleni emuva kokubhudubezwa ngontanga yakhe okusolwa ukuthi bebezama ukumdlwengula. Umfundi oneminyaka eyisikhombisa ofunda uGrade 1 eThembalethu Primary kuthiwa wayesekilasini kwenzeka lesi sigameko.
Uyise, eligodliwe igama lakhe ukuvikela umfundi, uthe lokhu kwenzeka ngo-Okthoba 15.
“Ingane yabuya esikoleni ingcolile unina wacabanga ukuthi ibidlala. Kwafika izingane efunda nazo zizobika ukuthi ibanjwe abafana esikoleni bayikhumula. Zithe kwalamula omunye umfana okhulile ngoba umntanami wayebanjwe izandla, omunye umfana ephezu kwakhe,” kusho uyise wengane.
Uthe babeyisithupha abafana okuthiwa babehlanganyele ingane. Uthe ngakusasa unina wengane waya esikoleni wafica iphini likathishanhloko elathi akaqale ayothola incwadi kadokotela.
“Waya esibhedlela wavula necala emaphoyiseni. Kwahlelwa nokuthi ingane ibonwe osonhlalakahle, nokuqondane nomhlangano wabazali babafana abathintekayo esikoleni. Unina wafika abanye abazali sebehambile esikoleni singasalitholanga ithuba lokukhuluma. Okungiphatha kabi wukuthi akekho ongithintayo esikoleni ngokuthi kuhamba kanjani ngalolu daba. Ingane ayisayi esikoleni ngoba isiyesaba,” kusho uyise womgilwa.
Uthe umphumela kadokotela uveze ukuthi ingane ayidlwengulwanga. Ukhala ngokuthi lesi sehlakalo senzeka ekilasini othisha bezivalele emhlanganweni ezinye izingane zibuka ngamafasitela.
USihlalo wesigungu esilawula isikole, uMnuz Sandile Gwala, uthe abazange babikelwe kusanda kwenzeka lesi sehlakalo ngoba nengane ayishongo esikoleni nasekhaya. Uthe udaba luvezwe abafundi abangomakhelwane bengane.
“Silandele yonke imigudu efanele njengesikole. Umzali wengane wabizwa emhlanganweni nabazali bezingane ezithintekayo kodwa wangafika. Udaba silushiyele amaphoyisa ngoba sekuvulwe icala. Yisinqumo sakhe ukuyekisa ingane esikoleni ngoba nezinye ezithintekayo ziyaqhubeka nesikole,” kusho uGwala.
Uthe ngokwazi kwabo babili abafana abathinteka kulesi sehlakalo. Utshele Isolezwe ukuthi ngesonto eledlule babize amaphoyisa ezoxwayisa abafundi ngokunukubeza ngokocansi ngoba kungenzeka ukuthi izingane zicabanga ukuthi wumdlalo ngoba zisezincane.
Okhulumela amaphoyisa KwaZulu-Natal, uCaptain Nqobile Gwala, uthe amaphoyisa aphenya izinsolo zokudlwengulwa.
UMnuz Kwazi Mthethwa, okhulumela uMnyango wezeMfundo esifundazweni, uthe zonke izehlakalo ezithinta ukunukubezwa ngokocansi kumele zenganyelwe amaphoyisa. Uthe umzali kumele abikele isikole nabahloli uma ingane isisaba ukuya esikoleni ukuze kuthathwe ezinye izinyathelo.