Bacele umkhuleko kuNyazi
UMKHANDLU wabafundi enyuvesi yaseZululand, oNgoye usucele imithandazo kumholi wakwaShembe, eBuhleni uMnuz Mduduzi “Nyazilwezulu Shembe ukuthi lukhuleke ukuze kuphele isihlava sokufa kwabafundi kule nyuvesi.
Selokhu kuqale lo nyaka bangu-17 abafundi asebeshonile khona. Namhlanje ntambama kunomkhuleko oholwa nguMphrofethi Collins Dhlomo weCovenant Fellowship Church International, ezinkundleni zemidlalo zale nyuvesi ukukhulekela ukuphela kwesihlava esesifake ingebhe abafundi.
Umengameli womkhandlu wabafundi, uLindelani Duze, uthe uye kuNyazi ngeledlule ngesikhathi luvakashele eGingindlovu ukuze kukhulekelwe inyuvesi kule nkinga ebhekene nayo.
“Ngiye eJudayi, eGingindlovu ngeledlule lapho bengiyofuna umkhuleko enkingeni yokufa ngale ndlela kwabafundi. Sikhathazekile futhi siyasaba singabafundi ukuthi kulo nyaka uwodwa nje baningi abafundi asebeshonile. Kulaba abangu-10 benza unyaka wokugcina. Muva nje kubulewe umfundi wesifazane ezobhala ngakusasa, wadutshulwa ngezinhlamvu eziyisithupha kodwa kwangathathwa lutho ngesikhathi efika emqashweni ebuya ukuyofunda enyuvesi,” kusho uDuze.
Uthe kusanda kumuka omunye wabafundi eSt Lucia okumanje isidumbu sakhe asikatholakali. “Yingakho sinxusa abamabandla ukuthi basikhulekele kule nkinga esibhekene nayo. Le ndaba isidinga umkhuleko ngoba abanye abafundi basuke bengabulawanga umuntu,” kusho uDuze.
Ukhale ngezokuphepha enyuvesi, wathi ngezinye zezinto abazilwelayo.
“Kunzima kakhulu kubafundi abahlala emqashweni ngoba abekho onogada. Isikhungo sinabafundi abangu-18 000 kodwa sikwazi ukuhlalisa abafundi abangu-3 500. Iyinkinga eyokushoda kwezindawo zokuhlala, yingakho sihlale sixoxa nenyuvesi ukuthi iqashe ezinye izindawo zokuhlala kusalindwe ukuthi kwakhiwe izindawo zokuhlala,” kusho uDuze.
Nyakenye uDuze wayiswa enkantolo ngabafundi ababengeneme ngokuthi uphume phambili okhethweni lomkhandlu wabafundi.
Inyuvesi yanquma ukuthi ifake ibamba emkhandlwini wabafundi, kuze kube nokhetho ngenyanga edlule.
“Ngonyaka odlule umkhandlu wabafundi ubungekho, bekukhona ibamba. Kulo nyaka abafundi baphinde bangethemba ukuthi ngibahole bangivotela futhi kakhulu, ngabuyela esikhundleni engangivele ngiphumelele kuso ngamalengiso.
Njengoba kunezinyanga nje singenile kuningi esesikwenzile siwumkhandlu wabafundi njengokuthi bekunenkinga yokungakhishwa kwemali yokugibela yabafundi kodwa sithe uma singena sayilwela, imali sebeyayithola. Kuningi nokunye esisazokulwela ngoba sifuna ukuhlanza igama lenyuvesi ukuze ibuyelwe isithunzi,” kuqhuba uDuze owenza iMasters kwi-Economics.
Uthe kunokubhekana ngeziqu zamehlo phakathi kweSasco neYCL, okuyinhlangano yentsha yamaKhomanisi.
“Lokhu okwenzeka kuzwelonke nasesifundazweni phakathi kwe-ANC neSACP kwehlela oNgoye.
Kunokubhekana ngeziqu zamehlo ekubeni ngabe sisebenza ndawonye njengoba siyingxenye yeProgressive Youth Alliance (PYA).”