Bafuna kudedelwe umbiko wemfundo yamahhala
IKOMITI lemfundo ephakeme ePhalamende libhalele uNgqongqoshe wemfundo ephakeme uSolwazi Hlengiwe Mkhize lifuna anxuse ukuthi kudedelwe umbiko wemfundo yamahhala.
UMengameli Jacob Zuma uthe uzowukhipha lo mbiko njengoba sekuphele izinyanga ezimbili awuthola kwikhomishini eyayiholwa yijaji eselathatha umhlalaphansi uJonathan Heher.
USihlalo waleli komiti, uNksz Connie September, uthe bakhathazekile ngomthelela wokungakhishwa kwalo mbiko.
Uthe yize bekwamukela ukuthi uZuma kusadingeka awufunde kodwa kungalunga uma ungashesha udedelwe.
“Ukukhishwa kwalo mbiko yinto ebhekwe uwonke wonke ezweni. Siyazi ukuthi uZuma kusadingeka awufunde bese exhumana noNgqongqoshe kodwa kudingeka ukhishwe ngokushesha,” kusho uNksz September.
Uthe kungenzeka kube nezinxushunxushu ngenxa yokungakhishwa kwalo mbiko.
“Akusizi ngalutho ukungawukhiphi, kulindiswe abantu. Akwamukelekile ukuthi umbiko uzokhishwa kancane kancane ikakhulu utholakale emithonjeni yabezindaba. Kumele ukhishwe ukuze amanyuvesi azi ukuthi kumele azihlele kanjani izimali. Ukukhishwa kwawo kuzokwenza ukuthi kwenziwe izinqumo eziphusile ngokuthi imali kumele inyuswe ngamalini,” kusho uNksz September.
Kwenzeka lokhu nje enyuvesi yaseKapa kube nemibhikisho abafundi befuna udedelwe lo mbiko.
Ihhovisi likaZuma lithe lo mbiko uzodedelwa maduze.