Ziyavalwa izicelo zokuba ngamaphoyisa
BANGU-35 000 asebefake izicelo zokuba ngamaphoyisa kuMasipala weTheku njengoba kuvalwa namuhla ngo-12 emini.
USuperintendent Glen Ndlovu wezokuxhumana ekomkhulu lamaphoyisa kamasipala, uthe abasafuna ukufaka izicelo kumele bafike namuhla engakashayi u-12 emini eDurban Metro Police Training Centre, eLahee Park ePinetown. Ukufakwa kwezicelo kuqale ngo-Okthoba 20 kanti bekuvuleleke kwabesilisa nabesifazane kuleli.
UNdlovu uthe bayajabula ukuthi phezu kokuthi abantu bebefika ngobuningi ukuzofaka izicelo, sigwemekile isiminyaminya.
“Sibeke amasonto amabili okufaka izicelo ukugwema isiminyaminya nokunyathelana kwabantu. Besizilungiselele ukubhekana nanoma yiziphi izigameko ebezingadalwa isiminyaminya. Siyazi eminyakeni edlule kuke kwaba nezinkinga zokugcwala kakhulu kwabafuna ukufaka izicelo, yingakho siqinisekise ukuthi senza konke okusemandleni ukugwema lesi simo. Ukubeka amasonto amabili kunike ithuba nokuthi abebengenazo izinto eziphelele, babuyele emakhaya bayozilungiselela,” kuchaza uNdlovu.
UNdlovu uthe baqinise ezokuphepha, kwafakwa amaphoyisa anele ukubheka isimo. Kuphinde kwabekwa nama-ambulensi ukunikeza usizo oluphuthumayo uma kunesidingo.
Njengoba kuvalwa ukufaka izicelo namuhla, kulindele ukuthi isibalo sikhule. Ngokusho kukaNdlovu bangu-200 okuqinisekiswe ukuthi bazoqashwa esigabeni sokuqala. Uthe kuzolokhu kuqashwa ngezigaba njengoba kuzogcina kuqashwe abangu-900. Abanye bazoqashwa ngoJanuwari nangoJuni.
Ukufaka isicelo kuseyisiqalo njengoba kuzobuye kuhlungwe abazodlulela phambili, kwenzinye izigaba ezihambisana nezinye izivivinyo nokuhlolwa isimo sempilo.
Okufunekayo kwabazofaka izicelo kumele babe neminyaka ephakathi kuka-18 no-35. Kumele kube ngowakuleli, ongakaze abe necala lobugebengu, abe nesitifiketi sika-matric, akwazi ukukhuluma kahle isiNgisi nolunye ulimi olusemthethweni kuleli. Kufuneka izincwadi zokushayela zikaCode 8.
UNdlovu ukhumbuze abantu ukuthi izikhangiso zezikhala zomsebenzi zifakwa kwi-website kamasipala nasephephandabeni lakhona EzaseGagasini nakwamanye amaphephandaba. Ugcizelele ukuthi ngeke selulwe isikhathi sokufaka izicelo, yingakho kubalulekile ukuthi abasasele bafike namuhla engakashayi u-12.