Liyadlondlobala ibhizinisi lobuciko nobuchwepheshe
UKE uzibuze ukuthi ungalikhulisa kanjani ibhizinisi lomkhiqizo owusebenzisayo ukuze babe baningi abawusebenzisayo?
Mhlawumbe impendulo ingathi cha kodwa intokazi yaseManzimtoti, uNksz Noxolo Nkabinde, yathenga isipikha esenziwe ngepayipi elikhipha amanzi endlini, idrain pipe, ekuqaleni konyaka maqede yafisa ukulisabalalisa.
UNksz Nkabinde uthe lesi sipikha esigaxwa ehlombe, esingu70cm esidlala umculo, i-radio, sifaka i-USB, i-memory card futhi uyakwazi ukusixhuma kwiTV, wasithanda esibona kumngani wakhe.
UNksz Nkabinde onenkampani ethuthukisa amabhizinisi iphinde yenze i-branding wabona ithuba lokukhulisa lo mkhiqizo ube sezingeni eliphezulu.
Ngemuva kokuhlangana noMnuz Siyabonga Ndwalane owakha lezi zipikha, lo msebenzi wobuciko wezobuchwepheshe usuphenduke ibhizinisi.
UNdwalane wazakhela lesi sipikha ngoba edinwe ukuthi usefelwe ngezintathu ayezithengile.
Wasebenzisa ipayipi elihambisa amanzi alicosha lilahliwe nezinye izinto ayeziqaqe ezipikheni ezindala ebezifile.
Uthe wayengaqondile ukwenza ibhizinisi kodwa wayekwenza ngoba ecikwe ukufa kwezipikha ezintathu zilandelana.
UNksz Nkabinde noNdwalane basungule iKingdom Technology edayisa lezi zipikha ezinkundleni zokuxhumana. Njengamanje bathi bafuna ukulikhulisa leli bhizinisi libe sesigabeni sokuncintisana nezinkampani ezinkulu ezidayisa izipikha.
Okwamanje amakhasimende abo ngabantu abathanda ubuciko obuhlanganiswe nobuchwepheshe nezinkampani ezenza izipho.
“Njengoba sesiyinkampani umkhiqizo wethu siwuhlukanise kabili, owokuqala ikhasimende lithenga lokho elikubonayo noma lisho ukuthi lifuna isipikha salo sibukeke kanjani ngaphandle. Abanye bathanda ukuthi kubhalwe amagama noma ama-logo ezinkampani zabo noma amagama alabo ababapha izipho,” kusho yena.
Amapayipi abawasebenzisayo bawacela ezinkampanini zokwakha ezisuke ziwalahla.