Kuqalwa izigcawu zabazali abangabodwana
UKUSHUKWA yizingane zabafana azikhulise yedwa, kumenze wafisa ukusiza abanye besifazane abafana naye, uNksz Ndoni Radebe, oseqale izithangami zabazali abakhulisa izingane ngabodwana.
UNksz Radebe, obedume emsakazweni iVuma FM ashiye kuwo ngoJuni, ubevele aziwa nangokwethula izinkulumo ezakhayo. NgoMgqibelo uzobe eqala isithangami sokuqala ezindlini zomsakazo eSABC eThekwini, lapho kuzobe kuhlangene khona abazali abakhulisa izingane ngabodwana.
“Nginamadodana amabili aneminyaka engu-19 no-13. Ngibonile indlela okunzima ngayo ukukhulisa izingane wedwa. Ngike ngabuka nefilimu ethi Single Moms ngabona ukuthi ziningi kanjani izinselelo ezibhekene nabazali abangabodwana. Kwesinye isikhathi uncamela ukuyeka ukwenza ezinye izinto ukuze ukwazi ukugxila ekukhuliseni izingane,” kuchaza yena.
Uthe waqala ngo-2015 ukuvula ikhasi kuFacebook alibize ngeSingle Parents’ Diaries. Kuleli khasi ubebhala zonke izigigaba ahlangabezana nazo ngokuba ngumzali ongayedwana. Ubebuye abhale imiyalezo eyakhayo, ekhuthaza abanye abazali abanjengaye.
“Ngigcine ngibone ukuthi sengenza kakhulu umsebenzi wokweluleka abantu ekubeni ngingawufundelanga. Bengihlangana nabesifazane abaningi befuna ngibaxazululele izinkinga. Ngabona kumele ngithole indlela yokusiza bonke laba besifazane ndawonye ngokwenza izithangami zokucobelelana,” kusho yena.
Uthe ngesikhathi kufika lo mbono wayecabanga ukuthi uzosiza abesifazane kuphela, wabuye wabona ukuthi bakhona nabesilisa abadinga ukusizwa. Ubukele nakumfowabo uMfundisi Thomas Radebe, odume ngezinkulumo ezakhayo kuKhozi FM, naye athi ukhulise yedwa izingane zamantombazane ngaphambi kokushadelwa. Uveze ukuthi nguye umfowabo omsizile ukufeza leli phupho lezithangami njengoba naye ezoba ngesinye sezikhulumi.
Uzimisele ukuhambela nezinye izifundazwe ukusiza nabanye abazali abangabodwana. Kwezinye izikhulumi ezizobe zishiyelana inkundla kubalwa uNkk Zola Ngidi oyiPsychologist, uThembeka Mnguni odume emncintiswaneni i-The Voice SA ngonyaka odlule. UThembeka uzobe ekhuluma ngezinselelo zokukhulisa ingane ene-Autism. Kukhona noNkk Zonke Shazi-Hlongwane ongumeluleki wentsha nezingane, onengosi Ikusasa Ngelakho kwiSolezwe NgeSonto. Kungenwa ngoR200 kulo mcimbi.
UNksz Radebe ungumphathi wohlelo iChoral Sound kwiSoweto TV ngoMgqibelo.