Ubengaziboni ehlonishwa
UBENGAZIBONI esezingeni lokuhlonishwa kwezamabhizinisi owesifazane oklonyeliswe emcimbini Imbokodo Iyazenzela Women In Business Awards.
UNkk Makhosi Mngoma onenkampani yezokuxhumana Amacenge Onke Trading Enterprise, uhlonishwe ngesonto eledlule ngesitifiketi emcimbini ohlelwa yiThala minyaka yonke. Ungomunye wabaqokwe ngamalungu omphakathi ngokubona igalelo lakhe emphakathi. UNkk Mngoma, osanda kusungula iphephandaba lomphakathi iSivubela Intuthuko eliqale ukutholakala ngoMashi, uthe ubengalindele ukuthi usengashesha aphakanyiswe kwezamabhizinisi.
“Ngatshelwa ukuthi ngiqokiwe, kwafika abebezongiphonsa imibuzo ngomsebenzi engiwenzayo emphakathini. Ngiyacabanga ukuthi bahlabeka umxhwele njengoba sengigcine ngihlonishwa emcimbini omkhulu kangaka. Bengingalindele ngoba bengizitshela ukuthi ngisacathula ebhizinisini.”
Uthe ukholwa wukuthi ukuhlonishwa kwakhe kuzomvulela amathuba. Bathenjiswe ukuthi Ithala lizolandelela ukuthi amabhizinisi abo ahamba kanjani ngemuva kokuhlonishwa.
Echaza ngokungena kwakhe ebhizinisini, uthe wasula emsebenzini esebenzela inhlangano ezimele. Inkampani yezokuxhumana wayisungula ngo2007 ehlose ukusizana nomasipala ukuletha intuthuko emphakathini.
“Bengivele nginothando lokuthuthukisa umphakathi. Kuthe senginenkampani ngabona ithuba lokusungula iphephandaba elehlukile, elizoletha izindaba zokuthuthukisa umphakathi. Sihlukile kwamanye amaphepha ngoba sigxile ezindabeni eziletha intuthuko nezemidlalo ezingajwayelekile,” kusho uNkk Mngoma.
Uthe iphephandaba lakhe liphuma kanye ngenyanga eThekwini, litholakale nakwezinye izikhungo zomphakahi. Isifiso sakhe wukuthi likhule, liphume okungenani kabili ngenyanga.
UNkk Mngoma, okhulele eNyoni, eMandeni, unohlelo Isivubela Intukutho ngoLwesine ngo-6 kuya ku-9 ebusuku kwiVibe FM. Ukhuluma ngezithuthukisa umphakathi, ameme namakhansela ukuze abalaleli bazibekele izikhalo nezidingo zabo. Uneziqu zeCommunications azithola e-Anchorlite College eThekwini, wabuye wafunda nase-Unisa ukuqhuba zona lezi zifundo.
UNkk Mngoma ungomunye wabesifazane abawu-20 abafike kowamanqamu kwabawu-146 abebehlanganyele emncintiswaneni weThala. Ngokwesitatimende esithunyelwe Ithala bazoqeqeshwa, bacijwe ukuze bakwazi ukuphucula amabhizinisi abo achume. Kumanje sebeqalile ukucijwa yiCutting Edge Business Solutions ukusimamisa amabhizinisi abo.