Uyomela elakuleli kowosozinyama
UFISA uhlonishwe njengeminye imidlalo umncintiswano wosozinyama owesifazane ozomela iNingizimu Afrika phesheya ngempelasonto ezayo.
UNksz Ntombi Mbambo (47), uzimisele nokubuya nesicoco eRomania e-Europe, lapho eyoncintisana nabanye besifazane bamazwe kwi-International Federation Body Building Junior and Masters Championship. Ukhethwe ukuyomela elakuleli emuva kokuba ehlule bonke abesifazane emncintiswaneni wosozinyama ngoSepthemba.
Kulo mncintiswano uqale ezingeni lezifundazwe waphuma phambili ngaphambi kokuyomela iKwaZulu-Natal eMpumalanga.
“Ngaqala ukujima ngo-1997 ngibukela kumculi uTina Turner, indlela enomzimba owakheke kahle ngayo. Ngazitshela ukuthi nami angifuni ukuguga, ngaqala ukujima.
“Kuthe sengijima omunye uzakwethu ejimini wangitshela ukuthi kungangifanela ukungenela umncintiswano wosozinyama ngenxa yomzimba wami,” uchaza kanje.
Uthe wabuye wahlaba ikhefu ekungeneleni imincintiswano ngo-2004 emuva kokubeletha. UNksz Mbambo onamadodana amabili eneminyaka engu-11 neneyisishiyagalombili, uthe esaqala ukuba usozinyama abesilisa babemsaba.
“Bengike ngisukelwe umfana angitshele ukuthi akangisabi, angangishaya. Sekungcono manje nabo abesilisa sebeyakhuthazeka uma bengibona. Baye babuze ukuthi ngenza kanjani ukuba namamasela kanje ekubeni nginezingane. Bakhona nabebecabanga ukuthi angiyena owesifazane ophelele kanti ngiyintokazi impela, ngiyathanda nokugqoka amaqhoks,” kusho yena.
Emuva kokuthola ingane yesibili uke waphinde wahlaba ikhefu, wabuyela ngokugcwele ngo-2012. Uthe abanye besifazane bezwe ukuthi usebuyile, bahoxa ekungeneleni imincintiswano ngoba besaba yena. Uzishaya isifuba ukuthi akekho osezingeni lakhe esifundazweni. Uveze ukuthi okwamanje ushaya u-65kg esikalini kodwa kumele kufike umncintiswano eseshaya u-60. Ukulungiselela umncintiswano uthe ujima kathathu ngosuku isonto lonke. Uyazijimela kodwa ubuye abe nomqeqeshi wakhe. Ugxila ekusebenziseni izinsimbi ezakha amamasela, abuye agijime ukuze afike esisindweni esifanele umncintinswano. Uthe kudingeka ashintshe nendlela yokudla uma sekusondele umncintiswano, adle ufishi aphuze namanzi. Mayelana nokudla impuphu okuthiwa ngeyokwakha amamasela uthe: “Lena yimikhiqizo yokwandisa izakhamzimba. Ukube siyidlela ukwakha amamasela ngabe asisajimi.”
Echaza ngomncintiswano aya kuwo uthe kuhlungwa ngamamasela okuyiwona okumele agqame. Okumphatha kabi ukuthi umqhudelwano wosozinyama awuthathwa njengomsebenzi ongaziphilisa ngawo njengeminye imidlalo kuleli. Uthe akakwazi nokuthola abaxhasi njengeminye imidlalo. Nokho lokhu akumqedi amandla ngoba uthi akwenzayo kusuka othandweni.
UNksz Mbambo obewuthisha weMaths eMargot Fonteyn Secondary eKlaarwater, wayeka ngonyaka odlule.
“Izingane esikoleni bezingibiza ngoMiss Sgora,” esho ehleka.