KwaSars bakhokhe kakhudlwana kunanyakenye
ABAKWA-South African Revenue Services (Sars) sebekhokhele abakhokhi bentela imali engaphezu kukaR120 billion kusukela nonyaka.
Abakhokheliwe ngabasuke bebanjelwe ngokungafanele imali yentela. Kulindeleke ukuthi sikhule lesi sibalo njengoba sekusele kancane ukuthi ivalwe isizini yentela. Ukukhokha lezi zikweletu kubakhokhi bentela nonyaka kunyuke ngo-5 % njengoba ngonyaka odlule kwakhokhwa uR95.6 billion.
AbakwaSars bathi kulo nyaka wezimali bakwazile ukonga uR20 billion wemikhonyovu yabasuke befuna ukukhokhelwa ngokungemthetho.
KwiPersonal Income Tax kukhokhwe uR20.5 billion ngesizini ka-2014/15, kwakhokhwa uR20.8 billion ngo2015/16, kwakhokhwa uR23 billion ngesizini ka-2016/17.
KwiCorporate Income Tax ngo2014/15 kukhokhwe uR10.8 billion, kwakhokhwa efanayo ngo-2015/16.
Kule sizini sekukhokhwe uR6.9 billion.
“Yize sizibophezele ekutheni abakhokhi bentela babuyiselwe imali abakweletwa yona, kuwumsebenzi wethu futhi ukugwema ukulahlekelwa inzuzo okuthinta nomnotho wakuleli.
Yingakho siqinisekisa ukuthi sizama ngayo yonke indlela ukulwa nobugebengu bokuthi abantu bafune ukukhokhelwa kungafanele. Siyazi ukuthi abakhokhi bentela babhekana nesikhathi esinzima ngenxa yokuhamba kancane kohlelo lokukhokhelwa kwabo.
Lokhu kwenziwa ukuthi sisuke sifuna ukwenza isiqiniseko sokuthi kukhokhelwa abantu abafanele. Siyaxolisa kubo bonke abathintekile ngokubambezeleka kokukhokhelwa,“kusho isitatimende.
Kuvela ukuthi eminyakeni emithathu edlule amacala avuliwe athinta inkohlakalo kwiPersonal Income Tax afinyelele emalini ewuR148 billion.
Njengoba isiya ngasemaphethelweni isizini yentela, abakwaSars bandise izikhathi zokusebenza sekuvulwa nangoMgqibelo kwamanye amagatsha. Bangaphezu kuka-12 000 abakhokhi bentela asebesizwe ngoMgqibelo kusukela ngoSepthemba. Lokhu kwenzelwa ukuthi kushaye uNovemba 24 okuwumnqamulajuqu wesizini yentela, kube sekuphothuliwe ukubuyisela amafomu. Emahhovisi akhethiwe ukwandisa izikhathi zokusebenza, kuvulwa ngoMgqibelo ngo-8 ekuseni kuvalwe ngo 1 emini. Kuzoqhubeka kuze kushaye uNovemba 18. Abafuna ukuthola ulwazi ngamagatsha anezelwe izikhathi zokusebenza bangashayela ku-0800 00 7277.
Khona manjalo, abakwaSars ngaleli sonto bamemezele ukuthi isikhulu ebesimisiwe uMnuz Jonas Makwakwa, sibuyele emsebenzini izolo. UMakwakwa oyisikhulu esiphezulu kwiBusiness and Individual Tax, ubesemiswe isikhathi esingangonyaka.