Umfundi ubhale incwadi ehlomisa abanye
UMFUNDI ozalwa ekhaya elintulayo waseNkaseni, eWeenen, ubhale incwadi ahlose ngayo ukusiza abafundi abaqede u-matric kodwa bengazi ukuthi bazokwenzani.
USiyabonga Masoka (osesithombeni) owenza unyaka wokuqala kwiBcom Accounting eNyuvesi yaKwaZulu-Natal, ophikweni oluseMgungundlovu ubhale incwadi ethi Life After Matric. Le ncwadi uthe usaswele imali yokuthi ishicilelwe ukuze itholakale ezitolo, okwamanje usayidayisa iyibhuku elingahluziwe.
Uthe iyakhuthaza, ihlomise abaqede u-matric ngezinto abangazenza kunokuthi bakhethe ukuyosebenza emafemini, eGoli.
USiyabonga futhi ongumsunguli wenkampani iSiyabonga Masoka Initiative (Pty) Ltd, uthe ubefunda eMashunka, eMsinga waphasa ngo-distinction abayisithupha, nyakenye. Uthe u-80% wozakwabo ayefunda nabo bafudukela eGoli beyofuna imisebenzi ngoba bengenayo imali yokuqhubeka nokufunda futhi bengenalo ulwazi lokuthi bangasizakala kanjani uma bezimisele ngemfundo.
“Iningi labazali babafundi bakule ndawo abasebenzi, bathembele kwisibonelelo sikahulumeni, uma beqeda u-matric bathatha indlela enqamulelayo yokuyofuna umsebenzi emafemini. Ngokubona kwami lokhu akubasizi kakhulu ngoba bathola amatoho, impilo yabo ingathuthuki. Ngemuva kweminyaka embalwa babuye beze emakhaya. Isimo silokhu siqhubeka sifana,” usho kanje.
Uthe uyakholwa ukuthi ngale ncwadi yakhe bakhona abazosizakala bakhethe indlela yokufunda noma yokuvula amabhizinisi ukuze kuthuthuke indawo yangakubo.
Ngaphandle kwalolu hlelo uthe unomkhankaso wokucela umfaniswano nezincwadi zasebeqede u-matric, azinike abazidingayo.
“Kunabafundi okuthi uma sekuphele ukubhala badabule umfaniswano ngoba bazi ukuthi sebeqedile. Lowo mfaniswano usuke usengabasiza abanye abafundi,” kusho uSiyabonga. Uthe uyalwazi usizi lokuswela njengoba naye uyise ungunogada ube nesikhathi eside engasebenzi. “Ngesikhathi esasebenza bekuke kube nezinyanga lapho kuba nenkinga yokuthi angaholi. Umama akasebenzi ubebamba eyeka engazi ukuthi sizolala sidleni. Ngiyazi maningi amakhaya afana nakithi ,” kusho uSiyabonga.