IDowns iphuthwe yithuba lokusayina umdlali omncane
IMAMELODI Sundowns iphuthwe yithuba lokusayinisa umdlali osemncane waseZambia uLameck Banda okubatshazwa ikhono lakhe.
UBanda, (16) ogijima kwiNkwazi yaseZambia, uzicije neSundowns amasonto amathathu. Abadlali beqembu bese bembiza ngoSadio Mane okuyisilomo somdlali waseSenegal ogijima kwiLiverpool edlala kwi-English Premier League (EPL).
Imenenja yakhe, uMike Ngobeni we-M-Sport-Management, ithe uBanda ngeke esasayina kwiSundowns kodwa akusho ukuthi ayiyithandi indlela adlala ngayo.
“ISundowns ithathekile yikhono likaBanda. Ibizimisele ukumsayinisa kodwa sashaywa yimithetho yeFifa. UBanda uneminyaka ewu-16 kuphela kanti imithetho ayimvumeli ukuthi adayiselwe iSundowns. Ngaleyo ndlela kuvunyelwane ngokuthi uzobuyela eqenjini lakhe.
“ISundowns izolokhu imbheka ukuthi wenza kanjani. Uma eseneminyaka ewu-18 uzobe esengasayina kwiSundowns. NgoJanuwari uzobe ehlanganisa iminyaka ewu-17 okusho ukuthi iSundowns angaze ayijoyine ngo-2019 ngoJanuwari okuyinto eseduze uma ubheka ukuthi unyaka usuphelile,” kusho uNgobeni.
UBanda uzakhele igama ngesikhathi esiza iqembu lesizwe laseZambia lika-Under-17 ekutheni linqobe isicoco seCosafa Cup.
“UBanda uzobuyela eqenjini lakhe. NgoDisemba sibheke ukuthi abe seqenjini lesizwe laseZambia elizobe lilungiselela iChan,” kusho uNgobeni.
IZambia ikhona emaqenjini azodlala kwiChan ngonyaka ozayo eMorocco. UBanda useke wabizelwa naseqenjini elikhulu leZambia. Ubekhona ngesikhathi libhekene neNigeria emdlalweni wokuhlungela ukuzibekisela indawo kwiNdebe yoMhlaba eseRussia ngonyaka ozayo.
Uqophe umlando kwazise ube ngumdlali omncane kunabo bonke eZambia ukubizelwa kwelesizwe. Uphule irekhodi lengwazi uKalusha Bwalya oseke waba ngisho umengameli wasoseshini waseZambia.
Yize ayebiziwe emdlalweni weZambia neNigeria kodwa wagcina engadlalanga.
ISundowns isanda kuwashiswa ijezi kwiTelkom Knockout yiChippa United. Izolo ebusuku ibibhekene neOrlando Pirates emdlalweni we-Absa Premiership e-Orlando Stadium, eSoweto.